राज्यातल्या पहिल्या व्याघ्र प्रकल्प क्षेत्रात दोन बिबट्यांचा संशयास्पद मृत्यू

अमरावती येथील मेळघाट व्याघ्र प्रकल्पात दोन बिबट्यांचा मंगळवारी संशयास्पदरित्या मृतदेह आढळला. मेळघाटातील सिपना वनपरिक्षेत्रातील सीमाडोह या अतिसंरक्षित भागांत दोन्ही बिबट्यांचे मृतदेह पाचशे मीटरच्या अंतरावर आढळले. वनाधिका-यांच्या प्राथमिक अंदाजानुसार, दोन्ही बिबट्यांचा मृत्यू व्हायरल संसर्गामुळे झाला असावा. परंतु शवविच्छेदन अहवालाअंती नेमके कारण समजेल, अशी माहिती वनाधिका-यांनी दिली. दोन बिबट्यांचा मृतदेह आढळल्यानंतर या घटनेमागे विषबाधा झाली आहे, याबाबतही तपास सुरु करण्यात आला आहे.

( हेही वाचा : महिलांना फसवून वेश्या व्यवसायात ढकलणाऱ्या धर्मांध मुसलमानांना अटक)

नेमकी घटना काय

मंगळवारी दुपारी मेळघाटातील अतिसंरक्षित भागात सकाळी साडेनऊच्या सुमारास नर बिबट्याचा मृतदेह वनाधिका-यांना आढळला. या बिबट्याचे वय अंदाजे तीन वर्ष असावे, असा अंदाज पशुवैद्यकीय अधिका-यांनी व्यक्त केला. या बिबट्याचा मृतदेह ताब्यात घेऊन पशुवैद्यकीय अधिका-यांनी शविवच्छेदन प्रक्रिया पार पडली. त्याचदरम्यान घटनास्थळापासून पाचशे मीटर अंतरावर मादी बिबट्याचा मृतदेह वनाधिका-यांना सापडला. अंदाजे दीड वर्षांच्या मादी बिबट्याचा मृतदेह अकरा वाजण्याच्या सुमारास वनाधिका-यांना आढळला. दोन्ही घटना पाहता हा मृत्यू नैसर्गिक आहे की नाही, याबाबत निश्चित सांगता येत नाही, असे वनाधिका-यांनी सांगितले. नागपूर येथील गोरेवाडा प्राणिसंग्रहालयात दोन्ही मृतदेहाचे नमुने प्रयोगशाळा तपासणीसाठी पाठवण्यात आले आहेत. अहवालानंतर याबाबत निश्चित माहिती दिली जाईल, असेही स्पष्ट करण्यात आले.