तब्बल १२ वर्षांनी मुंबईतील तिहेरी बॉम्बस्फोटाचा खटला झाला सुरू

तब्बल १२ वर्षांपूर्वी मुंबई झालेल्या तिहेरी बॉम्बस्फोटाच्या खटल्याच्या सुनावणीला विशेष न्यायालयासमोर सुरुवात झाली. त्यानुसार प्रथम साक्षीदाराच्या साक्षीदाराची उलट तपासणी झाली.

२७ जणांचा झालेला मृत्यू 

बॉम्बस्फोटात जखमी झालेल्या लोकांच्या शरीरातील स्प्लिंटर्स काढणारा डॉक्टर हा या खटल्यात पहिला साक्षीदार होता, त्याने महाराष्ट्र संघटित गुन्हेगारी नियंत्रण कायदा (मोक्का) न्यायालयासमोर साक्ष दिली. 2011 मध्ये मुंबईतील दादर, ऑपेरा हाऊस आणि झवेरी बाजार परिसरात तीन शक्तिशाली बॉम्बस्फोट झाले होते, ज्यात 27 लोकांचा मृत्यू झाला, तर 127 जण जखमी झाले होते. महाराष्ट्र दहशतवाद विरोधी पथकाने (एटीएस) दावा केला आहे की, इंडियन मुजाहिद्दीन ही दहशतवादी संघटना या स्फोटामागील सूत्रधार होती. यासीन भटकळ या संघटनेचा संस्थापक होता. या प्रकरणात अटक करण्यात आलेल्या आरोपींनी यापूर्वी जलद खटला चालवण्यासाठी अनेक विनंत्या केल्या होत्या. मात्र, न्यायालयाने तसे करण्यास असमर्थता व्यक्त केली. या प्रकरणात किमान नऊ जणांवर आरोप ठेवण्यात आले होते. खटल्याच्या प्रतीक्षेत असताना एकाचा मृत्यू झाला.

(हेही वाचा भारतात लवकरच धावणारी हायड्रोजन ट्रेन आहे तरी काय?)

का झाला खटल्याला उशीर? 

महाराष्ट्र दहशतवाद विरोधी पथकाचे (एटीएस) विशेष सरकारी वकील उज्ज्वल निकम यांनी 2022 मध्ये साक्षीदार आणले होते आणि ते खटला चालवण्यास तयार होते. तथापि, काही आरोपींचे प्रतिनिधीत्व करणार्‍या वकिलांनी याचिका दाखल केली की, सर्व आरोपी न्यायालयात उपस्थित नसल्यामुळे त्यांच्या अनुपस्थितीत खटला चालवणे कठीण होते. अशा प्रकारे, त्यांनी आरोपींच्या उपस्थितीत साक्षीदारांचे पुरावे नोंदविण्याचा आग्रह धरला. कारागृह प्रशासनाने आरोपींना प्रत्यक्ष किंवा व्हिडिओ कॉन्फरन्सद्वारे हजर केले नाही. त्यामुळे पुरावे नोंदवण्याचे प्रकरण पुढे ढकलण्यात आले. काही आरोपी दिल्लीच्या तिहार तुरुंगात, तेलंगणाच्या चेर्लापल्ली तुरुंगात आणि बंगळुरू तुरुंगात आहेत. व्हिडिओ कॉन्फरन्सिंगद्वारेही या कैद्यांना वारंवार न्यायालयात हजर केले जात नव्हते. आरोपींवर भारतीय दंड संहितेअंतर्गत गुन्हेगारी कट रचणे, खून, खुनाचा प्रयत्न आणि हानी पोहोचवणे, तसेच बेकायदेशीर कृत्य प्रतिबंध कायदा आणि MCOCA अंतर्गत गुन्हे दाखल करण्यात आले आहेत.