राज्याचे मुख्यमंत्री एकनाथ शिंदे यांचा गुरुवारी, ९ फेब्रुवारी रोजी वाढदिवस आहे. सकाळपासून मुख्यमंत्र्यांना शुभेच्छा दिल्या जात आहेत. त्यात ज्येष्ठ समाजसेवक अण्णा हजारे यांनी दिलेल्या शुभेच्छा विशेष लक्ष वेधून घेत आहेत. अण्णा हजारे यांनी मुख्यमंत्री शिंदे यांना फोन करून तुमच्या कामाच्या बातम्या वाचतो, चांगले काम करत आहात. असेच काम पुढ सुरू ठेवा. आमचा आशिर्वाद चांगल काम करणाऱ्या लोकांच्या पाठिमागे कायम आहे, अशा शब्दांत कौतुक केले.
तुमची जोडी चांगले काम करते
उपमुख्यमंत्री देवेंद्र फडणवीस यांनीही मुख्यमंत्री शिंदे यांच्या ठाणे येथील निवासस्थानी जाऊन भेट घेऊन शुभेच्छा दिल्या. राज्यातील इतर राजकीय नेते देखील एकनाथ शिंदेंना वाढदिवसाच्या शुभेच्छा देत आहे. त्यानुसार ज्येष्ठ समाजसेवक अण्णा हजारे यांनीही मुख्यमंत्री शिंदेंना फोनवरुन शुभेच्छा दिल्या आहेत. हा व्हिडीओ सध्या सोशल मीडियावर व्हायरल झाला आहे. तळागाळातून परिवर्तन होणे गरजेचे होते. तुमची जोडी चांगली काम करते. ही जोडी महाराष्ट्राला चांगली मिळाली आहे. तुमचा महाराष्ट्रासाठी एक-एक क्षण महत्वाचा आहे. तो क्षण तुम्ही राज्याच्या समाजकारणासाठी लावा, असेही अण्णा हजारे म्हणाले. मुख्यमंत्री पदी विराजमान झाल्यानंतर एकनाथ शिंदे यांचा हा पहिलाच वाढदिवस आहे. त्यांना शुभेच्छा देण्यासाठी ठाण्यात रात्री कार्यकर्त्यांनी गर्दी केली होती. ठाण्यात अनेक ठिकाणी मुख्यमंत्री एकनाथ शिंदे यांच्या वाढदिवसानिमित्त बँनर लागले आहेत. काही ठिकाणी बॅनरवर भेटला विठ्ठल असे लिहिले आहे.
Join Our WhatsApp Community