आघाडीतील २० ते २२ आमदार संपर्कात; उदय सामंतांचा गौप्यस्फोट

महाविकास आघाडीतील २० ते २२ आमदार आमच्या संपर्कात आहेत असा गौप्यस्फोट उद्योगमंत्री उदय सामंत यांनी केला आहे. माढा तालुक्यात आयोजित करण्यात आलेल्या कुस्ती स्पर्धेच्या कार्यक्रमात त्यांनी हे वक्तव्य केले आहे. तसेच राजकारण्यांनी सुद्धा कुस्तीप्रमाणे खिलाडूवृत्ती शिकावी असेही उदय सामंत म्हणाले. यापुढे लोकसभेचे असो किंवा विधानसभेचे सर्व कुस्त्या शिंदे-फडणवीस सरकार जिंकणार असा विश्वास उदय सामंत यांनी व्यक्त केला.

( हेही वाचा : १०० डब्यांची ही ट्रेन चालवतात ७ चालक! जगातील सर्वात लांब प्रवासी रेल्वेविषयी जाणून घ्या)

महाविकास आघाडीचे २० ते २२ आमदार संपर्कात असल्याचा गौप्यस्फोट

बच्चू कडू यांच्या संपर्कात आघाडीमधील १० ते १२ तर माझ्या संपर्कात ८ ते १० आमदार असल्याने महाविकास आघाडीचे एकूण २० ते २२ आमदार संपर्कात असल्याचा गौप्यस्फोट उदय सामंत यांनी टेंभूर्णीत केला. तसेच महापालिकेचे मैदान असो लोकसभेचे असो अथवा विधानसभा सर्व कुस्त्या शिंदे फडणवीस सरकार जिंकणार असा विश्वास त्यांनी व्यक्त केला. यावेळी उदय सामंत यांच्यासह ज्येष्ठ नेते विजयसिंह मोहिते पाटील, शिंदे गटाचे संपर्क प्रमुख शिवाजी सावंत उपस्थित होते.

दरम्यान येत्या पंधरा दिवसांमध्ये महाविकास आघाडीतील १० ते १५ आमदार भाजप, शिंदे गटात प्रवेश करतील असा दावा बच्चू कडू यांनी केला आहे. सरकार बहुमतामध्ये आहे. म्हणजेच २०-२५ आमदार इकडे तिकडे झाले तरी फरक पडणार नाही सरकार आपला कार्यकाळ पूर्ण करेल असेही बच्चू कडू म्हणाले.