CM Eknath Shinde : लोकसभा निवडणुकीनंतर राज्यात राजकीय भूकंप; मुख्यमंत्री एकनाथ शिंदे यांचे सूचक विधान

शिवडी-न्हावाशेवा सेतूला अटल सेतू असे नाव देण्यात आले आहे. हा सेतू नावाप्रमाणेच अटल आहे. पंतप्रधान नरेंद्र मोदींच्या हस्ते उद्घाटन झालेला अटल सेतू हा भूकंपाचे मोठमोठे धक्के सहन करण्यास सक्षम आहे. मात्र येत्या लोकसभा निवडणुकीच्या निकालांनंतर मोठा राजकीय भूकंप येणार आहे. त्याचे धक्के विरोधी पक्ष सहन करू शकणार नाहीत, असा सूचक इशारा मुख्यमंत्री एकनाथ शिंदे (CM Eknath Shinde) यांनी दिला.

हा सेतू विजयच्या दिशेने घेऊन जाणारा मार्ग आहे. जसे सागरी सेतू बांधून श्रीरामाने अहंकाराला मारले होते, तसे हा सेतूही अहंकाऱ्यांचा अहंकार संपवणार आहे. पंतप्रधान मोदी देशभरात सद्भावनेचा पूल बांधत आहेत, अब कि बार ४०० पार हे ध्येय ठरवले आहे, महाराष्ट्रात अबकी बार ४५ पार ध्येय आहे. विकासाच्या माध्यमातून हे आम्ही साध्य करणार आहे. संपूर्ण देशात सर्वात जास्त इन्फ्रा प्रकल्प सुरु आहेत, हा सेतू पुणे, गोवा, वसई-विरार यांना जोडणारा आहे. हा सेतू अर्थव्यवस्था बदलणारा ठरणार आहे. सरकार अतिशय गतीने काम करत आहे. ५०-६० वर्षात जे करू शकले नाही ते मोदींनी करून दाखवले आहे. त्यामुळे भलेभले देश मोदींचे नाव अभिमानाने घेत आहेत. विकासाच्या मुद्यावर केंद्र कायम आमच्यासोबत आहे. लेख लाडकी लखपती ही योजना सुरु होत आहे. देशात कोट्यवधी राम भक्तांचे राम मंदिर झाले पाहिजे हे स्वप्न होते शिवसेनाप्रमुख बाळासाहेब ठाकरे आज असते तर त्यांनी मोदींचे कौतुक केले असते, असेही मुख्यमंत्री शिंदे (CM Eknath Shinde) म्हणाले.