आसामचे मुख्यमंत्री हिमंता बिस्वा सरमा (Himanta Biswa Sarma) हे कायम रोखठोक भाष्य करत असतात. विशेष म्हणजे लांगुलचालन करण्याच्या राजकारणावर ते सडेतोड मते मांडत असतात. सध्या हरियाणात विधानसभा निवडणुकीची रणधुमाळी सुरु आहे. त्या पार्श्वभूमीवर बोलताना मुख्यमंत्री सरमा म्हणाले, काँग्रेसने देशाच्या कानाकोपऱ्यात लहान मुलांना मोठे केले आहे. अयोध्येत जसे बाबरराज संपले तसेच रामराज सुरू झाले, हे आपल्याला करायचे आहे. आजही या देशात छोटे-छोटे बाबर फिरत आहेत, त्यांना या देशाबाहेर हाकलून द्यायचे आहे, आम्हाला मुल्ला नको डॉक्टर हवे आहेत, असे ते म्हणाले.
राहुल गांधी आमच्या आसाममध्ये आले होते. तुम्ही मला विचारत होता की, तुम्ही 600 मदरसे बंद केलेत, तुमचा भविष्यातील हेतू काय आहे? मी राहुल गांधींना सांगितले, सध्या मी 600 बंद केले आहेत, पुढे जाऊन सर्व बंद करेन. हा आमचा हेतू आहे आणि दुसरा कोणताही हेतू नाही. आम्हाला देशात मदरसा शिक्षण नको आहे, डॉक्टर आणि इंजिनिअर हवे आहेत, मुल्ला नकोत. आसामच्या मुख्यमंत्र्यांनी सोनीपतमधून भाजपाचे उमेदवार निखिल मदान यांच्यासाठी मत मागताना जाहीर सभेत हे वक्तव्य केले. सरमा (Himanta Biswa Sarma) यांनीही येथे माध्यमांशी संवाद साधला. दरम्यान, हरियाणात काँग्रेसचे सरकार स्थापन होण्यापूर्वी मुख्यमंत्री भूपेंद्र हुड्डा यांच्या दाव्यावर आसामचे मुख्यमंत्री म्हणाले, ‘हुड्डा जी यांचे संबोधन थोडे चुकीचे आहे. काँग्रेस नक्कीच येणार आहे, पण भारतात नाही तर इटलीत.
(हेही वाचा Dharavi Masjid Demolition : धारावीतील अनधिकृत मशीद हटवण्याच्या कामाला सुरुवात)
शेतकरी आणि सरपंचांना मारहाण केल्याच्या राहुल गांधींच्या आरोपाबाबत सरमा (Himanta Biswa Sarma) म्हणाले, ‘राहुल गांधींनी काय केले, मला सांगा? पंजाबमधील शीख हत्येपासून ते आसाममधील नरसंहारापर्यंत काँग्रेसने काय केले नाही? काँग्रेस आपल्या भारतीयांच्या रक्तात न्हाऊन निघते, हे त्यांचे काम आहे. काँग्रेसच्या हमीभावावर आसामचे मुख्यमंत्री म्हणाले, ‘8,500 रुपयांची हमी आठवते का? ती काही उपयोगाची हमी होती का? हमीपत्र घेऊन हिमाचलला आलो होतो, त्यातील एकाचीही अंमलबजावणी झाली का? काँग्रेसची हमी पंक्चर झालेल्या टायरसारखी आहे, असेही सरमा म्हणाले.
Join Our WhatsApp Community