नागपूर जिल्हा मध्यवर्ती सहकारी (NDCC) बँक घोटाळ्याप्रकरणी माजी मंत्री सुनिल केदार (Sunil Kedar) यांच्याविरुद्ध सुरू असलेल्या चौकशीला स्थगिती देण्यास नागपूर खंडपिठाने नकार दिला आहे.
काय आहे प्रकरण ?
NDCC बँकेचे माजी अध्यक्ष म्हणून केदार यांच्यावर आर्थिक गैरव्यवहारांचे आरोप असून, त्यांनी बँकेला २२ कोटी रुपयांचे नुकसान केल्याचा ठपका आहे. या घोटाळ्याचा तपास बँकेतील गैरव्यवस्थापन आणि नियमबाह्य कर्जवाटपावर आधारित आहे. या चौकशीसाठी विशेष समिती स्थापन करण्यात आली होती. केदार यांनी या चौकशीला स्थगिती देण्याची विनंती केली होती. मात्र न्यायालयाने ती फेटाळून लावत चौकशी पुढे सुरू ठेवण्याचे निर्देश दिले.
याआधी NDCC बँक प्रकरणात केदार यांना दोषी ठरवून पाच वर्षांच्या कारावासाची शिक्षा आणि ५०,००० रुपयांचा दंड ठोठावण्यात आला होता. त्यांनी या शिक्षेला स्थगिती मिळावी यासाठी उच्च न्यायालयात दाद मागितली होती. उच्च न्यायालयाने त्यांना तात्पुरता दिलासा दिला, पण चौकशी चालू ठेवण्याचे आदेश दिले.
नियमबाह्य कर्जवाटप व गैरव्यवस्थापनाचे आरोप
उच्च न्यायालयाने प्रकरणाशी संबंधित सर्व पक्षकारांना आपली बाजू मांडण्याचे निर्देश दिले होते आणि यावरील सुनावणी १५ ऑक्टोबर रोजी पार पडली. न्यायालयाने चौकशीच्या महत्त्वावर भर देत ती अखंडित सुरू राहावी, असे स्पष्ट केले.
NDCC बँक घोटाळ्याचा तपास १९९०च्या दशकातील प्रकरणांशी जोडलेला आहे, ज्यात नियमबाह्य कर्जवाटप व गैरव्यवस्थापनाचे आरोप आहेत. केदार आणि अन्य आरोपींनी योग्य प्रक्रिया न पाळता कर्ज मंजूर केल्याचा आरोप आहे, ज्यामुळे बँकेला मोठे नुकसान झाले.
न्यायालयाच्या आदेशानुसार, केदार यांच्या चौकशीला थांबवण्याच्या विनंतीस पुरेसा आधार नसल्याचे स्पष्ट झाले आहे. याशिवाय, सहकारी बँक व्यवस्थापनातील जबाबदारी सुनिश्चित करणे अत्यंत महत्त्वाचे असल्याचे न्यायालयाने नमूद केले आहे. पुढील सुनावणी ३ डिसेंबरला होणार आहे.
राजकीय वाद आणखी गडद
सध्या सुरू असलेल्या विधानसभा निवडणुकीत काँग्रेस नेते सुनिल केदार पुन्हा वादाच्या भोवऱ्यात अडकले आहेत. त्यांनी रामटेक मतदारसंघात अपक्ष उमेदवार आणि माजी काँग्रेस नेते राजेंद्र मुळक यांच्या प्रचारासाठी उघड पाठिंबा दिला आहे. यामुळे शिवसेना (उद्धव ठाकरे गट) च्या स्थानिक नेत्यांमध्ये नाराजी पसरली आहे.
रामटेकमधील उबाठा गटाच्या नेत्यांनी केदार यांची वागणूक ‘अप्रामाणिक’ असल्याचे म्हटले आहे. यावर प्रतिक्रिया देताना केदार म्हणाले, “आमचे ध्येय स्पष्ट आहे. शिंदे गटाचे आमदार आशिष जैस्वाल यांनी उद्धव ठाकरे यांचा अपमान केला आहे. त्यांना धडा शिकवायचा आहे.”
निवडणूक अर्ज भरण्याच्या शेवटच्या दिवशी केदार यांनी उद्धव ठाकरेंना भेटून मुळक यांना शिवसेनेच्या चिन्हावर उमेदवारी देण्याची विनंती केली होती. मात्र, उद्धव ठाकरे (Uddhav Thackeray) याला तयार नव्हते. त्यामुळे मुळक यांनी अपक्ष उमेदवार म्हणून निवडणूक लढवण्याचा निर्णय घेतला. उबाठा गटाचे प्रवक्ते आनंद दुबे म्हणाले, “अशा परिस्थितीत महाविकास आघाडीच्या मतांमध्ये फूट पडण्याचा धोका आहे. ही बाब टाळायला हवी होती.”
दरम्यान, काँग्रेस प्रवक्ते अतुल लोंढे यांनी म्हटले, “काँग्रेस पक्ष अधिकृत एमव्हीए उमेदवाराला पूर्ण पाठिंबा देत आहे. पक्षविरोधात काम करणाऱ्या नेत्यांवर कारवाई करण्यात येईल.” रामटेकमधील हा वाद महाविकास आघाडीत फूट पडण्याची शक्यता निर्माण करत आहे.
हेही पहा –
Join Our WhatsApp Community