Jasprit Bumrah : जसप्रीत बुमराह आयसीसीचा वर्षातील सर्वोत्तम कसोटीपटू

• ऋजुता लुकतुके

भारताचा स्टार तेज गोलंदाज जसप्रीत बुमराहने (Jasprit Bumrah) आयीसीसीचा वर्षातील सर्वोत्तम कसोटीपटू होण्याचा मान मिळवला आहे. एकूणच २०२४ हे वर्षं बुमराहसाठी स्वप्नवत गेलं आहे. आणि यात त्याने १३ कसोटींत ७१ बळी टिपण्याची कामगिरी केली आहे. शिवाय आपल्या भेदक गोलंदाजीच्या जोरावर त्याने आधुनिक क्रिकेटमधील सर्वोत्तम गोलंदाज असल्याचा लौकिकही मिळवला आहे. खरंतर जवळ जवळ अख्खं वर्षं पाठीच्या दुखण्यात घालवल्यावर बुमराहने (Jasprit Bumrah) २०२३ च्या शेवटी पुनरागमन केलं.

पण, फॉर्म सापडण्यासाठी त्याने फारसा वेळ घेतला नाही. वर्षाची सुरुवात त्याच्यासाठी दक्षिण आफ्रिकेविरुद्ध केपटाऊन कसोटीने झाली. या कसोटीत दोन डावांमध्ये मिळून त्याने ८ बळी मिळवले. ही कसोटीही भारताने जिंकली होती. त्यानंतर इंग्लंडविरुद्ध मायदेशातील ५ कसोटी सामन्यांत त्याने १९ बळी मिळवले. भारताने टी-२० विश्वचषक (T20 World Cup) जिंकल्यानंतर भारतीय संघ बांगलादेशविरुद्ध दोन कसोटी सामने खेळला. आणि यात बुमराहने (Jasprit Bumrah) ११ बळी मिळवले. न्यूझीलंड विरुद्ध तो दोन कसोटी सामने खेळला. यात त्याने ७ बळी मिळवले.

(हेही वाचा – Budget 2025 : मध्यमवर्गीयांना अर्थसंकल्पात हवे आहेत कर रचनेत हे दहा बदल)

तर अलीकडेच ऑस्ट्रेलियाविरुद्धच्या मालिकेत ५ सामन्यांत ३२ बळी मिळवत तो मालिकावीरही ठरला होता. एका कॅलेंडर वर्षांत ७० पेक्षा जास्त बळी मिळवणारा तो कुंबळे, अश्विन आणि कपिल देव (Kapil Dev) नंतरचा फक्त चौथा भारतीय आहे. आयसीसी कसोटी (ICC Test) गोलंदाजांच्या क्रमवारीत सध्या तो अव्वल आहे.

‘Game Changer’ Jasprit Bumrah is awarded the ICC Men’s Test Cricketer of the Year 2024 🥁🥁

Bumrah took 71 wickets at a stunning average of 14.92, finishing as the highest wicket taker in Test cricket in 2024.#TeamIndia | @Jaspritbumrah93 pic.twitter.com/WHUciUK2Qb

— BCCI (@BCCI) January 27, 2025

(हेही वाचा – मुंबईकरांची प्रतीक्षा संपणार; प्रवाशांच्या सेवेत आणखी 10 Mono Rail दखल होणार)

मायदेशात किंवा परदेशातही बुमराह (Jasprit Bumrah) हे भारताचं मुख्य अस्त्रं बनला आहे. बुमराहच्या गोलंदाजीचा प्रभाव त्याच्या अचूकतेतून आणि सरासरीतून जाणवतो. कसोटी क्रिकेटमध्ये २००च्या वर बळी मिळवताना बुमराहने १९.४० ची सरासरी राखली आहे. तर षटकामागे त्याने फक्त २.७६ धावा दिल्या आहेत. आणि त्याचा स्ट्राईकरेटही आहे ४० धावांचा. २०० पेक्षा जास्त आंतरराष्ट्रीय बळी मिळवलेल्यांमध्ये बुमराहची सरासरी जगात सर्वोत्तम आहे.

अलीकडे बुमराहने दोन कसोटींत भारताचं नेतृत्वही केलं आहे. आणि त्यातील पहिल्या पर्थ कसोटीत भारताला विजयही मिळाला.

हेही पहा –