-
ऋजुता लुकतुके
ऑस्ट्रेलियाचा माजी कर्णधार स्टिव्ह स्मिथने श्रीलंकेविरुद्ध गॉल इथं आव्हानात्मक परिस्थितीत शतक झळकावून कारकीर्दीतील आपलं ३५ वं शतक पूर्ण केलं. आणि समालोचन कक्षात बसून या खेळीचा आस्वाद घेणारा ऑस्ट्रेलियन माजी कर्णधार रिकी पाँटिंगला या खेळीनंतर या पिढीतील सर्वोत्तम कसोटीपटू कोण, या प्रश्नाचं उत्तर सापडलं आहे. समालोचन करतानाच त्याने कौल दिला की, ‘तो खेळाडू दुसरा तिसरा कोणी नसून स्टिव्ह स्मिथच आहे. त्याचे आकडेच पुरेसे बोलके आहेत,’ असं पाँटिंग म्हणाला. (Greatest Batsman of Generation)
(हेही वाचा- Virat Kohli : विराट कोहलीला छोट्या चाहत्याने जेव्हा प्रश्न विचारला, ‘भारताकडून खेळण्यासाठी काय करावं लागतं?’)
स्टिव्ह स्मिथने गॉलमध्ये १०,००० कसोटी धावांचा टप्पाही पार केला. आणि त्यानंतर त्याने मैदानाच्या चहूबाजूने आपली बॅट फिरवली. त्यानंतर दिवसअखेर त्याने आपलं शतकही पूर्ण केलं. रिकी पाँटिंग स्वत: कसोटी क्रमवारीत सचिन आणि जॅक कॅलिस यांच्यासह पहिल्या तीन कसोटी फलंदाजांपैकी एक आहे. पण, स्मिथचं कौतुक करताना तो थकला नाही. ‘या पिढीतील सर्वोत्तम कसोटीपटू ठरवताना मला फारसे कष्ट पडणार नाहीत. त्याच्या नावावर वाद होऊच शकत नाही. जो रुट आणि विल्यमसन यांनी मागच्या दोन वर्षांत आपला खेळ उंचावला आहे. पण, स्टिव्ह स्मिथची कामगिरी सातत्यपूर्ण आहे. २०१८ पर्यंत या स्पर्धेत विराट कोहलीही होता. पण, त्यानंतर तो मागे पडला. आता कसोटी क्रिकेटवर स्टिव्ह स्मिथचं राज्य राहील आणि ते आणखी काही काळ राहील,’ असं पाँटिंग म्हणाला. (Greatest Batsman of Generation)
जो रुटने गेल्या ४ वर्षांत १९ कसोटी शतकांची मजल मारली आहे. पण, स्टिव्ह स्मिथकडे जगातील सर्व प्रकारच्या खेळपट्टीवर खेळण्याचा आणि सर्व प्रतिस्पर्धी संघांविरुद्ध धावा करण्याचा अनुभव आहे असं पाँटिंगला वाटतं. स्मिथने २०५ डावांमध्ये कसोटीतील १०,००० धावा पूर्ण केल्या आहेत. या बाबतीत तो फक्त ब्रायन लारा, सचिन तेंडुलकर, कुमार संगकारा आणि रिकी पाँटिंग यांच्या मागे आहे. (Greatest Batsman of Generation)
(हेही वाचा- Virat Kohli : विराट कोहलीने दिल्ली संघाबरोबर केला जोरदार सराव, नम्रतेनं जिंकली सहकाऱ्यांची मनं)
पण, आणखी एक गोष्ट त्याला सर्वोत्तम बनवते, असं पाँटिंगला वाटतं. ‘स्मिथने ऑस्ट्रेलिया बाहेर खेळलेल्या ५३ धावांच्या सरासरीने ५,०८४ धावा केल्या आहेत. आणि परदेशात १७ कसोटी शतकं लगावली आहेत. हे आकडे मोलाचे आहेत,’ असं पाँटिंगला वाटतं. स्टिव्ह स्मिथने भारताविरुद्घच्या मालिकेतही दोन शतकं ठोकली होती. (Greatest Batsman of Generation)