मुंबईकरांच्या स्वाथ्याची काळजी घेण्यासाठी, जागतिक आरोग्य दिनानिमित्त रचना आर्टस् अँड क्रीएशन तर्फे ‘आरोग्यम धनसंपदा’ (Arogyam Dhansampada) या साप्ताहिक कार्यक्रमाचे आयोजन करण्यात आले होते. दि. ७ एप्रिलला या कार्यक्रमाचा सांगता समारंभ झाला. यावेळी आरोग्य क्षेत्रातील मान्यवरांनी कार्यक्रमाला हजेरी लावली. यावेळी आरोग्य दिनाचे औचित्य साधत कॅम्युनिटी डेव्हलपमेंट ऑफिसर ब्लड बँक, केईएमचे हेमंत सकट यांचा ‘हिंदुस्थान पोस्ट’चे संपादक स्वप्नील सावरकर यांच्या हस्ते सत्कार करण्यात आला. तसेच स्वातंत्र्यवीर सावरकर राष्ट्रीय स्मारकाचे कार्यवाह राजेंद्र वराडकर यांच्या हस्ते सायली सेवा संकल्पचे दयागंड शेडगे आणि फॉमिलीचा सत्कार करण्यात आला.
( हेही वाचा : मंदिरांप्रमाणे चर्च आणि मशिदीही सरकारच्या नियंत्रणाखाली आणा; VHP ची मागणी)
जागतिक आरोग्य दिनानिमित्त रचना आर्टस् अँड क्रीएशन (Rachna Arts and Creation) तर्फे ‘आरोग्यम धनसंपदा’ (Arogyam Dhansampada) या साप्ताहिक कार्यक्रमाच्या सांगता समारंभास आयोजक रचना लचके- बागवे, स्वातंत्र्यवीर सावरकर राष्ट्रीय स्मारकाचे कार्यवाह राजेंद्र वराडकर, ‘हिंदुस्थान पोस्ट’चे संपादक स्वप्नील सावरकर, रक्त तपासणी उपक्रमासाठी अ‍ॅजिलस डायग्नोस्टिक्स फडके लॅबचे (Agilus Diagnostics Phadke Lab) प्रमुख डॉ. अविनाश फडके (Dr. Avinash Phadke), इन्स्टिट्यूट ऑफ केमिकल टेक्नॉलॉजीचे (ICT) कुलगुरू अनिरुद्ध पंडित, पद्मत्री उदय देशपांडे, वरिष्ठ स्त्रीरोगतज्ज्ञ डॉ. इरावती भिडे आदी मान्यवर उपस्थित होते. अर्थसंकेत आणि ‘हिंदुस्थान पोस्ट’ हे या उपक्रमाचे आऊटरिच पार्टनर आहेत. (World Health Day)
जागतिक आरोग्य दिनी (World Health Day) ७ एप्रिलला सप्ताहाच्या शेवटच्या दिवशी दोन परिसंवादाचे आयोजन करण्यात आले होते. मधुमेहाविषयी डॉ. अविनाश फडके आणि डॉ. मनीषा तालीम यांनी उपस्थितांना मोलाचे मार्गदर्शन केले. यावेळी डॉ. भूषण लचके यांनी लोकांच्या मनातील प्रश्नांना सुसंवादातून वाट मोकळी करून दिली. ओबेसिटी आणि लाइफस्टाइल डिसऑर्डर याविषयी डॉ. पुष्कर शिकारखाने (Dr. Pushkar Shikarkhane) आणि डॉ. श्रीनिवास कुडवा (Dr. Srinivas Kudwa) यांनी उपस्थितांना मार्गदर्शन केले. त्यात डॉ. श्रीनिवास कुडवा यांनी अनेकांच्या प्रश्नांना दिलखुलास उत्तर देऊन डॉक्टर म्हणून आपली कामाप्रती असलेली निष्ठा व्यक्त केली. मधुमेह आणि स्थूलता या दोन आजारांवर वेळीच कसे उपाय करायचे, त्यांना प्रतिबंधित कसे करता येईल यावर विचारमंथन यावेळी झाले. सोबतच आरोग्य दिनाचे औचित्य साधत डॉक्टर, नर्स, वॉर्ड बॉय, रुग्णवाहिका सेवक आणि सर्व आरोग्यदूतांचा सन्मान या दिवशी करण्यात आला. अवयव दान आणि शरीर दानाचा प्रसार देखील या कार्यक्रमात करण्यात आला.
सात दिवस चाललेल्या या उपक्रमात आरोग्य तपासणी आणि मानसिक आरोग्य या महत्वाच्या बनलेल्या मुद्यावर मार्गदर्शन, चर्चा यांचे आयोजन करण्यात आले होते. नेत्रतपासणी शिबिरात काचबिंदू, मोतीबिंदू किंवा मॅक्युलर डीजनरेशन आणि अन्य डोळ्यांच्या समस्यांवर तपासणी केली गेली. महिलांना जीवनाच्या प्रत्येक टप्प्यावर आरोग्य कसे राखायचे याबद्दल जागृकता निर्माण करण्यासाठी सेमिनारचे आयोजन करण्यात आले होते. यामध्ये हार्मोनल असंतुलन, प्रजनन आरोग्य आणि प्रतिबंधात्मक काळजी कशी घ्यायची हे सांगण्यात आले. अ‍ॅक्युपंक्चर आणि अ‍ॅक्युप्रेशर या प्राचीन पद्धती आहेत ज्या दीर्घकालीन आजारणावर उपयुक्त असतात, त्यामुळे विशेष सत्र आरोग्य सप्ताहात आयोजित करण्यात आले. अ‍ॅक्युपंक्चर आणि अ‍ॅक्युप्रेशर च्या साहायाने बरेच जण आपल्या वेदना कमी झाल्याचे सांगतात त्या सर्वांसाठी हे सत्र आयोजित केल्याचे आयोजक रचना लचके- बागवे यांनी सांगितले. (World Health Day)
यावेळी डॉ. मनीषा तालीम, डॉ. शिल्पा अभ्यंकर, डॉ. मधुकर शिंदे, डॉ. भूषण लचके, डॉ. केदार गांला, अनिल गारे, डॉ. प्रियंका खंडाळे, डॉ. श्रीनिवास कुडवा, डॉ. पुष्कर शिखरकर, डॉ. पद्मा बडे, नर्स मनीषा शिरसाट, वॉर्डबॉय अमोल पाटील आणि क्रिकेट सामन्यादरम्यान रक्तदान शिबिर राबवणारे साईराज मित्र मंडळातील तरुणांचा सत्कार करण्यात आला. जागतिक आरोग्य दिनानिमित्त वेगवेगळ्या ठिकाणी मागील महिन्याभरापासून १८ रक्तदान शिबिरांचे आयोजन करण्यात आले. त्यातून ८४० रक्ताच्या पिशव्या जमा करता आल्या. या उपक्रमाला १० रुग्णालयांनी मोलाचे सहकार्य केले, अशी माहिती रचना लचके- बागवे यांनी दिली.
हेही पाहा :
Join Our WhatsApp Community