मुंबईतील ‘ही’ रेल्वे स्थानके होणार विमानतळासारखी!

मुंबईतील काही महत्वाच्या रेल्वे स्थानकांचा कायापालट करण्यात येणार आहे. त्यासाठी काही रेल्वे स्थानके विमानतळांसारखी विकसित करण्यात येणार आहे, मुंबईतील सीएसएमटी, ठाणे, मुंबई सेंट्रल, बोरिवली, दादर, ठाकुर्ली या रेल्वे स्थानकांचा कायापालट करण्यात येणार आहे, असे केंद्रीय रेल्वे राज्यमंत्री रावसाहेब दानवे म्हणाले.

केंद्राने अशा प्रकारे देशभरातील ६८ रेल्वे स्थानकांची निवड केली आहे. त्यामध्ये मुंबईला प्राधान्य देण्यात आले आहे. या उपक्रमाच्या अंतर्गत भोपाळ, गांधीनगर आणि उत्तर प्रदेशातील काही रेल्वे स्थानकांचा कायापालट करण्यात आला आहे. आता मुंबईतील सीएसएमटी, ठाणे, मुंबई सेंट्रल, बोरिवली, दादर, ठाकुर्ली या रेल्वे स्थानकांचा कायापालट करण्यात येणार आहे, असे दानवे म्हणाले.

(हेही वाचा : गणेशोत्सवाच्या निमित्ताने ‘मोदी एक्स्प्रेस’ कोकणात रवाना!)

मुंबईतील रेल्वे स्थानकांचा पुनर्विकास करताना त्यामध्ये होणारी गर्दी कशी विभागली जाईल, प्रवेशद्वारांवर होणारी गर्दी कमी होईल, सुशोभीकरण, उपहारगृहे इत्यादी गोष्टींचा विचार करण्यात येणार आहे. यासाठी आपण दोन दिवस मुंबईच्या दौऱ्यावर आहोत. त्यानिमित्ताने सीएसएमटी ते ठाणे लोकल प्रवास केला आहे. प्रवास दरम्यान प्रवाशांच्या समस्या जाणून घेतल्या आहेत. त्यानंतर अधिकाऱ्यांशी चर्चा करणार आहे. त्यानुसार निर्णय घेणार आहे, अशी माहिती केंद्रीय राज्यमंत्री दानवे यांनी दिली.