अरेच्चा! पाकीटमारांनी पंतप्रधानांच्या सुरक्षा रक्षकालाही नाही सोडले

पंतप्रधान नरेंद्र मोदी यांची सुरक्षा अतिशय मजबूत आणि चौकस आहे. त्यांच्या सुरक्षा ताफ्यात एसपीजी कमांडोसह इतर अधिकाऱ्यांचा समावेश आहे. पंतप्रधानांच्या सुरक्षेवर दिवसाला एक कोटी ६२ लाख रुपये खर्च केले जातात. त्यांच्या ताफ्यातील सुरक्षा रक्षक एकाच वेळी ८५० राऊंड फायर करू शकतात. असे असूनही पंतप्रधानांचे संरक्षण करणाऱ्या एसपीजी कमांडोच्या पर्सची मुंबईत एका पॉकेट किलरने चोरी केली. विलेपार्लेहून महालक्ष्मीला एसपीजी कमांडो सुभाष चंद्रा यांचे पाकीट चोरीला गेले. यानंतर त्यांनी अंधेरी रेल्वे पोलिसांकडे तक्रार दाखल केली.

तक्रार केल्यानंतर तपास सुरू

याप्रकरणी अंधेरी पोलिसांनी खिसे चोरणाऱ्या टोळीचा पर्दाफाश केला असून एकाला अटक केली आहे. या घटनेचा अधिक तपास पोलिस करत आहेत. पंतप्रधान मोदींचे सुरक्षा रक्षक कमांडो सुभाष चंद्रा यांनी पाकीट मारल्याची तक्रार केल्यानंतर पोलिसांनी या प्रकरणाचा तपास सुरू केला आणि काही दिवसांतच पाकीट मारीच्या टोळीची माहिती मिळवली. सध्या पोलिसांनी मुंबईजवळील मीरा रोड येथील हैदर शमसुद्दीन याला अटक केली आहे.

( हेही वाचा : भारताच्या ‘रूपे’ ने उडवली ‘व्हिसा’, ‘मास्टर कार्ड’ ची झोप! )

रेल्वे पोलिसांनी दिली माहिती

याबाबत माहिती देताना अंधेरी रेल्वे पोलिस ठाण्याचे वरिष्ठ निरीक्षक दत्तात्रय निकम यांनी सांगितले की, सुभाष चंद्रा हे विलेपार्ले येथून महालक्ष्मीकडे जात असताना त्यांची पर्स चोरीला गेली. गुन्हा दाखल केल्यानंतर पोलिसांनी आपले काम सुरू करत हैदर शमसुद्दीनला मीरा रोड येथून अटक केली. सुभाष चंद्रा यांच्या डेबिट आणि क्रेडिट कार्डवरून १९ हजार रुपयांचे व्यवहार झाल्याचे तपासात समोर आले आहे. पोलिस सध्या सायबर क्राइम सेलच्या मदतीने पुढील तपास करत आहेत. अटक करण्यात आलेल्या आरोपींकडून आयसीआयसीआय बँकेचे स्वाइप मशीन आणि पेटीएम कार्डही जप्त करण्यात आले आहे.