पुण्यातील खेड तालुक्यात भर चौकात युवकाची गोळ्या घालून हत्या!

गेल्या आठवड्यात पुणे जिल्ह्यातील पिंपरी चिंचवडमध्ये भरदिवसा अज्ञातांनी गोळीबार केल्याची घटना घडली होती. त्यानंतर आता खेड तालुक्यातील चाकण परिसरात शेलपिंपळगाव येथे भर चौकात एका युवकाची गोळ्या घालून निर्घृण हत्या करण्यात आल्याची घटना समोर आली आहे. नागेश सुभाष कराळे (वय ३८, रा. शेलपिंपळगाव, ता. खेड, जि. पुणे) असे खून झालेल्या युवकाचे नाव आहे. हल्ल्यानंतर आरोपी फरार झाले आहेत. मात्र या घटनेने परिसरात खळबळ उडाली असून कायदा सुव्यवस्थेचा प्रश्न चव्हाट्यावर आला आहे.

असा घडला प्रकार

चाकण पोलिसांकडून मिळालेल्या माहितीनुसार, ही घटना गुरुवारी (दि.२४) रात्री सव्वानऊच्या सुमारास शेलपिंपळगाव येथील मिलिंद बिअर शॉपी जवळ घडली. नागेश कराळे हे आपल्या चारचाकी वाहनात बसत असताना लगतच फोर्ड फिगो वाहनात दबा धरून बसलेल्या हल्लेखोरांनी नागेशवर चार गोळ्या झाडल्याचे सांगितले जात आहे. या घटनेत नागेश गंभीर जखमी झाले. तात्काळ त्यांना चाकण येथील खाजगी रुग्णालयात उपचारासाठी आणले असता डॉक्टरांनी उपचारापूर्वीच त्यांची मयत झाल्याचे घोषित केले.

(हेही वाचा- पिंपरीत गोळीबाराचा थरार! सराईत गुन्हेगाराचा गोळ्या घालून खून)

खुनाच्या घटनेने परिसरात शोककळा

पिंपरी चिंचवड पोलीस आयुक्तालयाच्या वरिष्ठ पोलीस अधिकाऱ्यांनी घटनास्थळी दाखल धाव घेऊन पाहणी केली. चाकण पोलीस ठाण्यात रात्री उशिरापर्यंत पंचनामा व फिर्याद नोंदविण्याचे काम सुरू होते. दरम्यान जुन्या वादातून ही घटना घडल्याचा प्राथमिक अंदाज व्यक्त होत आहे. हल्ल्यात मृत पावलेले नागेश कराळे हे शेलपिंपळगाव येथे कुस्तीची तालीम चालवणारे पैलवान म्हणून परिचित आहेत. त्यामुळे त्यांच्या खुनाच्या घटनेने परिसरात शोककळा पसरली आहे.