पटोलेंविरोधात गुन्हा दाखल करण्यासाठी भाजप अखेर न्यायालयात

महाराष्ट्र काँग्रेसचे अध्यक्ष नाना पटोले यांनी पंतप्रधान नरेंद्र मोदी यांच्याविरोधात अशोभनीय वक्तव्य केल्याच्या निषेधार्थ भारतीय जनता युवा मोर्चा, मुंबई कार्यकर्त्यांनी न्यायालयाचे दरवाजे ठोठावले. युवा मोर्चाचे अध्यक्ष तेजिंदर सिंग तिवाना यांनी शिवडी येथील महानगर दंडाधिकारी न्यायालयात नाना पटोले यांच्या विरोधात याचिका दाखल केली असून कलम १५३बी, ५००, ५०४, ५०५(२), ५०६ अन्वये गुन्हा दाखल केला आहे.

पंतप्रधान पद घटनात्मक

न्यायालयातून बाहेर पडताना तिवाना म्हणाले की, देशाच्या पंतप्रधानाचे पद हे घटनात्मक पद आहे आणि या पदाचा अपमान करणे हा संपूर्ण देशाचा आणि भारतातील प्रत्येक नागरिकाचा अपमान आहे. देशाच्या न्याय प्रक्रियेवर आमचा पूर्ण विश्वास असून वेळ आल्यावर आम्हाला नक्कीच न्याय मिळेल आणि नाना पटोले यांच्यावर न्यायालयाकडून योग्य ती कारवाई केली जाईल, असेही ते पुढे म्हणाले. न्यायालयाच्या कामकाजाची माहिती देताना ऍड. मदन गुप्ता म्हणाले की, न्यायालयाने तेजिंदर सिंग तिवाना यांची याचिका स्वीकारून २८ जानेवारी २०२२ ही तारीख वादविवाद आणि निकालासाठी ठेवली आहे.

(हेही वाचा बाळासाहेबांनी सेनेला युतीत सडवले का? फडणवीसांचा उद्धव ठाकरेंना सवाल)

गुन्हा दाखल करण्याची मागणी

महाराष्ट्र काँग्रेसचे अध्यक्ष नाना पटोले यांनी पंतप्रधान नरेंद्र मोदी यांच्या विरोधात केलेल्या अशोभनीय वक्तव्याच्या निषेधार्थ भारतीय जनता युवा मोर्चा मुंबई भाजप अध्यक्ष मंगल प्रभात लोढा यांच्या अध्यक्षतेखाली भारतीय जनता युवा मोर्चा मुंबई अध्यक्ष तेजिंदर सिंग तिवाना यांच्या नेतृत्वाखाली भारतीय जनता युवा मोर्चा मुंबईच्या कार्यकर्त्यांनी निषेध व्यक्त केला होता. त्यांनी १८ जानेवारी रोजी मुंबईतील मरीन ड्राईव्ह पोलीस स्थानकाबाहेर आंदोलन केले आणि एफआयआर नोंदवण्याची मागणी केली होती , त्यावर डीसीपी यांनी युवा मोर्चा कार्यकर्त्यांना आश्वासन दिले की आज भंडारा येथे एफआयआर नोंदवण्याची प्रक्रिया सुरू आहे जर आज भंडारा येथे काही कारणास्तव एफआयआर नोंदविला गेला नाही तर एफआयआर नोंदविला जाईल. युवा मोर्चाची नोंदणी होणार आहे. या मागणीवर कोणीच बाहेर न आल्याने तेजिंदरने न्यायालयाचा दरवाजा ठोठावला आहे.