मॉकड्रीलमध्ये जखमी झालेल्या ‘त्या’ अग्निशमन जवानाचे निधन

माटुंगा येथील भाऊ दाजी रोडवरील श्री सिद्धी अपार्टमेंटसमोर मॉकड्रील दरम्यान झालेल्या अपघातात २९ जानेवारी २०२२ रोजी तीन जवान जखमी झाले होते. त्यातील गंभीर जखमी सदाशिव कर्वे या अग्निशमन जवानाचे ३ फेब्रुवारी २०२२ रोजी निधन झाले होते. भायखळा येथील अग्निशमन दलाच्या मुख्यालयात ४ फेब्रुवारी २०२२ रोजी जवानाचे पार्थिव मानवंदना देण्यासाठी व अंत्यदर्शनासाठी ठेवण्यात आले होते.

कर्वे यांना पाय गमवावा लागला

मुंबईच्या महापौर किशोरी पेडणेकर यांनी भायखळा मुख्यालयात ठेवण्यात आलेल्या पार्थिवाचे अंत्यदर्शन घेतले, तसेच मुंबईकरांच्या वतीने पुष्पचक्र अर्पण करून श्रद्धांजली वाहिली. अग्निशमन दलाच्या वतीने या जवानाला मानवंदना देण्यात येऊन पार्थिव नातेवाईकांना सुपूर्द करण्यात आले. सदाशिव कर्वे यांना या अपघातात आपला पाय गमवावा लागला होता. त्यांच्यावर बृहन्मुंबई महानगरपालिकेच्या सायन रुग्णालयात उपचार सुरू होते. परंतु त्यांची ३ फेब्रुवारी २०२२ रोजी प्राणज्योत मालवली. या अपघाताची चौकशी करण्याचे आदेश प्रमुख अग्निशमन अधिकाऱ्यांनी उपप्रमुख अग्निशमन अधिकाऱ्यांना यापूर्वीच दिले आहे. याप्रसंगी प्रमुख अग्निशमन अधिकारी हेमंत परब, तसेच अग्निशमन दलाचे संबंधित अधिकारी उपस्थित होते.

(हेही वाचा आता फास्टॅगही होणार बंद? जाणून घ्या कशी होणार टोलवसुली)