पुणे शहरात आणखी दोन ‘ई-बस’ डेपोंची भर

देशातील पहिला ‘ई-बस’ डेपो साकारणारे ‘पुणे महानगर परिवहन महामंडळ’ (पीएमपी) आता आणखी दोन ‘ई-बस’ डेपोची उभारणी करणार आहे. पुणे स्टेशन डेपो आणि निगडी डेपोअंतर्गत असलेल्या भक्ती-शक्ती डेपोमध्ये चार्जिंग स्टेशनची उभारणी करण्यात येणार आहे. त्यामुळे ‘ई-बस’च्या सेवेचा विस्तार होण्यास मदत होणार आहे.

‘पीएमपी’च्या ताफ्यात सध्या २९० ‘ई-बस’

‘पीएमपी’च्या ताफ्यात सध्या २९० ‘ई-बस’ आहेत. येत्या तीन महिन्यात उर्वरित बस दाखल होऊन ही संख्या ६५० वर जाणार आहे. ‘पीएमपी’ने ‘ई-बस’ पुरवठादार कंपनीला बसचा पुरवठा निर्धारित मुदतीत करण्याचे आवाहन केले आहे. या पार्श्वभूमीवर या बससाठी आवश्यक पायाभूत सुविधा उभारण्यासाठी पुरवठादार कंपनीला डेपोंचे हस्तांतरणही केला आहे. त्यामध्ये वाघोली, पुणे स्टेशन आणि भक्ती-शक्ती येथे संबंधित कंपन्यांकडून कामही हाती घेण्यात आले आहे, अशी माहिती ‘पीएमपी’तील अधिकाऱ्यांनी दिली.

(हेही वाचा – पुणे परिवहनमध्ये १०० टक्के ग्रीन बस!)

‘ई-बस’ डेपोसाठी ‘महावितरण’ला उपकेंद्र उभारावे लागणार

बाणेर येथील ‘ई-बस’ डेपोसाठी ‘महावितरण’ला उपकेंद्र उभारावे लागणार आहे. मात्र, जागेचा अडसर असल्याने सात किलोमीटर अंतरावर उच्चदाब वाहिनीद्वारे वीजपुरवठा केला जाणार आहे. सध्या निगडी डेपोअंतर्गत निगडी आणि भक्ती-शक्ती येथून बस संचालन केले जाते. त्यामध्ये निगडी येथून सीएनजी बसचे संचलन आणि भक्ती-शक्ती येथून केवळ ‘ई-बस’चे संचालन केले जाणार आहे. त्यासाठी भक्ती-शक्ती येथे चार्जिंग स्टेशन उभारले जाणार आहे. पुणे स्टेशन डेपो पूर्णत: ‘ई-बस’साठी विकसित केले जाणार आहे. वाघोली बस डेपो येथे चार्जिंग पॉइंट उभारले जाणार असून, त्यासाठी १४ किलोमीटरवरून उच्चदाब वीजवाहिनी टाकण्यात येणार आहे. ‘महावितरण’ने त्याचे कामही सुरू केले आहे.