आजचे सरकार बाळासाहेबांचे स्वप्न होते! संजय राऊतांचा खळबळजनक दावा

पुण्यात वसंत दादा शुगर इन्स्टिट्यूटच्या वतीने राज्यस्तरीय साखर परिषद २०२२चे उद्घाटन करण्यात आले, त्यावेळी मुलाखतीचे आयोजन करण्यात आले. तेव्हा एनसीपीचे अध्यक्ष शरद पवार, शिवसेना नेते संजय राऊत, मंत्री जितेंद्र आव्हाड आणि काँग्रेसचे प्रवक्ते सचिन सावंत उपस्थित होते, त्यांची मुलाखत चित्रलेखा साप्ताहिकाचे संपादक ज्ञानेश महाराव यांनी घेतली.

(हेही वाचा दहाव्या ‘अखिल भारतीय हिंदु राष्ट्र अधिवेशना’त होणार हिंदु राष्ट्राचा उद्घोष!)

बाळासाहेब ठाकरे यांच्याशी मी ३० वर्षे काम केले आहे, त्यांचा प्रभाव माझ्यावर आहेच. बाळासाहेब होते तेव्हा सामनामधून किंवा अन्य माध्यमातून बाळासाहेबांच्या वतीने मीच उत्तरे देत होतो. आताही आमचा पक्ष मोठा असला तरीही एखाद्या विषयावर हिमतीने बोलण्यासाठी जेव्हा मी उभा राहतो तेव्हा बाळासाहेबांची आठवण होते. तेव्हा बाळासाहेबांनी मला काय सांगितले असते, असा विचार येतो. अजूनही तुम्ही सामानाचे अग्रलेख वाचाल, तेव्हा ते बाळासाहेबांचेच विचार वाटतात, म्हणून ते अनेकांना भावतात, आज जर बाळासाहेब असते, तर आज जे काय भाजपचे उद्योग सुरु झाले आहेत, ते झालेच नसते. त्यांची हिंमत झाली नसती. आम्ही त्यांना बाळासाहबांसमोर चळाचळा कापताना पाहिले आहे. मातोश्रीत पाऊल टाकण्यासाठी १० वेळा विचार करायचे, परिस्थिती अजून बदलली नाही. आम्ही जर म्हटले आम्हाला काही गोष्टी दाखवायच्या असतील, तर दाखवू शकतो. पण आमचे सध्याचे नेते सुसंस्कृत आहेत, आम्ही बाळासाहेबांच्या पठडीत तयार झाले आहोत, त्यामुळे आम्ही सुसंस्कृतपणा मानत नाही, अंगावर आलात तर शिंगावर घेऊ, तुम्ही ज्या भाषेत बोलाल, त्या भाषेत आम्ही उत्तर देऊ, आमची भाषा प्रभावी आहे, आमची भाषा ठाकरी आहे, असेही संजय राऊत म्हणाले.