धनुष्यबाणासाठी शिवसेनेला केवळ १५ दिवसांची मुदत

धनुष्यबाण कुणाचा यावर उद्धव ठाकरे आणि एकनाथ शिंदे गटामध्ये वाद सुरू असून हा वाद आता निवडणूक आयोगाच्या दारात पोहोचला आहे. यासंबंधी कागदपत्रांची पूर्तता करण्याकरता उद्धव ठाकरे गटाने निवडणूक आयोगाकडून चार आठवड्यांची मुदत मागितली होती. त्यावर निवडणूक आयोगाकडून उद्धव ठाकरे गटाला पूर्ण वेळ द्यायला नकार दिला आहे. निवडणूक आयोगाच्या या निर्णयामुळे उद्धव ठाकरे गटाला 23 ऑगस्टपर्यंत आपले म्हणणे मांडावेच लागणार आहे. त्या आधी राज्यातील सत्तासंघर्षावर 22 ऑगस्टला सर्वोच्च न्यायालयात सुनावणी होणार आहे. तर 23 ऑगस्टपर्यंत निवडणूक आयोगाला उत्तर द्यावे लागणार आहे. त्यामुळे सर्वोच्च न्यायालयापाठोपाठ निवडणूक आयोगातही उद्धव ठाकरे गटाचे टेन्शन वाढणार असल्याचे चित्र आहे. लोकसभा, विधानसभा आणि पाठोपाठ शिवसेनेच्या राजकीय पक्ष रचनेतही आपले प्राबल्य असल्याचा दावा शिंदे गटाने केला आहे. त्यासाठीची आकडेवारी देखील निवडणूक आयोगासमोर मांडण्यात आली आहे. भाजपासोबत सरकार बनवणाऱ्या एकनाथ शिंदे यांनी 19 जुलै 2022 रोजी निवडणूक आयोगाला पत्र लिहिले होते.

(हेही वाचा मनुस्मृती महिलांना सन्मानाचे स्थान देते – उच्च न्यायालयाचे न्यायमूर्ती प्रतिभा सिंह)