ताम्हिणी घाटात भीषण अपघात; गाडी २०० फूट उंचावरून कोसळली, ३ जणांचा मृत्यू

रायगड जिल्ह्यातील ताम्हिणी घाटात भीषण अपघात झाला आहे. मिळालेल्या माहितीनुसार पुणे-माणगाव ताम्हिणी घाटातील कोंडेथर गावाच्या हद्दीत सुमारे २०० फूट उंचावरून गाडी खाली कोसळली. ही गाडी पुण्याकडून माणगावच्या दिशेने जात होती. गाडीतील एकूण ६ प्रवाशांपैकी ३ जणांचा मृत्यू झाला असून ३ जण गंभीर जखमी झाल्याची प्राथमिक माहिती आहे.

( हेही वाचा : हिमाचल आणि उत्तराखंडमध्ये पावसाचा हाहाकार; भूस्खलनामुळे २२ जणांचा मृत्यू, अनेक लोक बेपत्ता)

ताम्हिणी घाटात भीषण अपघात, पोलिसांसह स्थानिक रेस्क्यू टीम घटनास्थळी दाखल

शनिवारी सायंकाळी ६ च्या सुमारास हा अपघात झाला. या कारमध्ये वाशिम आणि अकोला येथील प्रवासी होते. हे प्रवासी कोकणात पर्यटनासाठी आले होते. वाशिमहून हे पर्यटक कोकणात देवगडला जात असताना वाटेत हा भीषण अपघात झाला. या अपघाताची माहिती मिळताच माणगाव पोलिसांसह स्थानिक रेस्क्यू टीम घटनास्थळी दाखल झाली आहे.

दरम्यान जखमींवर माणगाव उपजिल्हा रुग्णालयात औषधोपचार सुरू आहेत. याचा अधिक तपास माणगाव पोलीस करत आहेत.