पुणेकरांनो… गणेशोत्सवानिमित्त वाहतुकीत होतोय बदल, ‘या’ मार्गाने जाणे टाळा

गणेश मूर्ती खरेदीसाठी होणारी गर्दी व वाहतूक कोंडी टाळण्यासाठी वाहतूक पोलिसांनी पुण्यातील काही मार्गात एक दिवसासाठी वाहतूकीत बदल केला आहे.यामध्ये अण्णा भाऊ साठे चौक, जिजामाता चौक, सिंहगड रोड, मुंढवा चौक या मार्गांचा समावेश असणार आहे. हे बदल आज (दि.30) आणि उद्या (दि.31) साठी असणार आहेत. यामध्ये सकाळी सहा ते रात्री बारापर्यंत हा वाहतूक बदल असणार आहे.

(हेही वाचा – बाबरी विध्वंस आणि गुजरात दंगलीबाबत सर्वोच्च न्यायलयाचा मोठा निर्णय)

हा मार्ग वाहतूकीसाठी बंद 

पुण्यातील शिवाजी रोडवरील गाडगीळ पुतळा चौक ते गोटीराम भैय्या चौक वाहतूकीसाठी बंद करण्यात येत आहे. वाहन चालकांनी याला पर्याय म्हणून संताजी घोरपडे पथावरून कुंभारवेस चौक, शाहीर अमर चौक मार्गे इच्छित स्थळी जावे, किंवा संचेती चौकाकडून शिवाजी रोडने स्वारगेटकडे जाणाऱ्या वाहन चालकांनी बर्वे चौकातून डावीकडे वळून न जाता सरळ जंगली महाराज रोडने खंडोजीबाबा चौक, टिळक रोड मार्गे जावे.

या मार्गावर वाहतूक सुरु पण पार्किंग नाही

तसेच झाशीची राणी चौक ते खुडे चौक ते डेंगळेपुल मार्गे कुंभारवेसकडे जाणाऱ्या वाहन चालकांनी खुडे चौकातून मनपा पुणे समोरून प्रिमीयर गॅरेज चौक शिवाजीपुल मार्गे गाडगीळ पुतळा चौक डावीकडे वळून घेऊन कुंभारवेस चौक या मार्गाचा वापर करावा. तसेच सिंहगड रोडवरील सावरकर पुतळा ते समाधन भेळ सेंटर या मार्गावर वाहतूक सुरु राहील, मात्र गाडी पार्क करता येणार नाही.