Crime : पूर्व उपनगर हादरले, ६४ वर्षीय महिलेवर लैंगिक अत्याचार करून विवस्त्र अवस्थेत रस्त्यावर फेकले
शहरातील पूर्व उपनगरातील मानखुर्द (Crime) येथील महाराष्ट्र नगर परिसरात ६४ वर्षीय महिला पहाटेच्या सुमारास बेशुद्ध अवस्थेत काही नागरिकांना आढळून आली. या महिलेला क्रूररीत्या मारहाण करून तिच्यावर लैंगिक अत्याचार करण्यात आल्याची धक्कादायक घटना समोर आली आहे. पीडित महिलेला उपचारासाठी महानगर पालिकेच्या रुग्णालयात दाखल करण्यात आले असून ट्रॉम्बे पोलिसांनी लैंगिक अत्याचार, गंभीर दुखापत प्रकरणी गुन्हा दाखल करून त्याच परिसरात राहणाऱ्या ३८ वर्षीय रिक्षा चालकाला अटक केली आहे. या घटनेने पूर्व उपनगर संतापाचे वातावरण पसरले असून महिलांच्या सुरक्षेचा प्रश्न ऐरणीवर आला आहे.
उमेश ढोक (३८) असे अटक करण्यात आलेल्या नराधमाचे नाव असून त्याने गुन्ह्याची कबुली दिली असल्याची माहिती पोलिसांनी दिली आहे. उमेश ढोक याच्यावर यापूर्वी देखील बलात्कार आणि पोक्सोचा गुन्हा दाखल असल्याचे तपासात समोर आले आहे. पीडित महिलेची ओळख पटविण्यात आली असून ती चेंबूर येथील आरसीएफ पोलीस ठाण्याच्या हद्दीत आपल्या विवाहित मुलीसोबत राहण्यास आहे. मासे विक्री करून पीडित महिला आपला उदरनिर्वाह करीत असल्याचे समोर आले आहे.
सोमवारी रात्री पीडित महिला ही मानखुर्द येथे मासे विक्री करून घरी जाण्यास निघाली होती, त्यावेळी उमेश ढोके हा रिक्षा घेऊन आला, व त्याने पीडितेचा घरी सोडतो असे सांगून रिक्षात बसवले, परंतु पीडित महिलेला चेंबूर घरी येते घेऊन न जाता मानखुर्द महाराष्ट्र नगर या ठिकाणी असलेल्या स्वतःच्या घरी घेऊन आला. पीडितेचा घरात घेऊन त्याने दार आतून बंद करून पीडितेसोबत बळजबरी करू लागला, पीडितेने त्याला विरोध करताच त्याने पीडितेला विवस्त्र करुन काठीने तिला मारहाण केली, त्यानंतर रात्रभर तिच्यावर लैंगिक अत्याचार करुन पहाटे पाच वाजण्याच्या सुमारास पीडितेला जखमी व विवस्त्र अवस्थेतच घरातून बाहेर आणून घरापासून काही अंतरावर तिला टाकून पळून गेला असे पीडित महिलेने आपल्या जबाबात पोलिसांना सांगितले.
या प्रकरणी ट्रॉम्बे पोलिसांनी भादवी. कलम ३७६ (बलात्कार), ३७६ (२) (एन) (एकाच महिलेवर वारंवार बलात्कार), ३२५ (स्वेच्छेने गंभीर दुखापत करणे), ३२३ (स्वच्छेने दुखापत करणे) आणि ५०४ अन्वये गुन्हा दाखल करून तात्काळ आरोपीचा शोध घेऊन मानखुर्द परिसरातून उमेश ढोक या रिक्षा चालकाला अटक करण्यात आली आहे. चौकशीत ढोक याच्यावर २०१७ मध्ये पोक्सो आणि लैंगिक अत्याचाराचा गुन्हा मानखुर्द पोलीस ठाण्यात दाखल असून ढोक याला अटक करण्यात आली होती.हेही पहा-https://www.youtube.com/watch?v=MpgvHP8CqS0
