पालघरमध्ये अल्पवयीन मुलीवर सामुहिक अत्याचार! ८ जणांना अटक

पालघरमध्ये १६ वर्षीय मुलीवर सामुहिक अत्याचार झाल्याची धक्कादायक घटना घडली आहे. यामुळे परिसरात खळबळ उडाली असून याप्रकरणी ८ जणांना अटक करण्यात आली आहे. पालघर तालुक्यातील माहीम परिसरात पाणेरीनजीक १६ वर्षीय अल्पवयीन मुलीला निर्जनस्थळी नेण्यात आले यानंतर तिच्यावर ८ जणांनी अत्याचार केला.

( हेही वाचा : भारताचा बांगलादेशविरुद्ध १८८ धावांनी विजय! गुणतालिकेत घेतली मोठी झेप, कसोटी चॅम्पियनशिपमधून पाकिस्तान बाहेर…)

तांत्रिक बाबींच्या आधारे मुलीचा शोध

अत्याचारानंतर पीडित मुलीने या घटनेची माहिती पोलिसांनी दिली, तिने आठ जणांविरोधात तक्रार नोंदवली आहे. सागरी पोलीस ठाण्यात पोक्सो अंतर्गत गुन्हा दाखल करण्यात आला आहे.

शनिवारी १७ डिसेंबर रोजी दुपारी दोन वाजता माहीम पोलीस ठाण्यात पीडित तरुणीच्या वडिलांनी अल्पवयीन मुलगी शुक्रवारी रात्रीपासून घरी आली नसल्याची तक्रार केली. तिच्याशी फोनवर संपर्क साधला असता ती फोनवर रडत असल्याची माहिती तिच्या कुटुंबियांकडून देण्यात आली. यानंतर तांत्रिक बाबींच्या आधारे मुलीचा शोध घेण्यात पोलिसांना यश आले. त्यानंतर या पीडित मुलीने घडलेल्या सर्व प्रकाराची माहिती पोलिसांनी दिली.

पीडित अल्पवयीन मुलीची वैद्यकिय तपासणी करण्यात आली असून तिची प्रकृती बरी असल्याची माहिती पोलिसांनी दिली आहे. दरम्यान शनिवारी अकोल्यामध्ये सुद्धा गुंगीचे औषध देत दोन मुलींवर सामुहिक अत्याचाराची घटना घडली होती.