Ghatkopar Hoarding Accident : फरार अर्षद खानला अखेर अटक

• प्रतिनिधी

सतरा जणांचा बळी घेणाऱ्या घाटकोपर होर्डिंग दुर्घटना प्रकरणात फरार असणाऱ्या अर्षद खान याला गुन्हे शाखेने सोमवारी अटक केली आहे. अर्षद खानला किल्ला न्यायालयात हजर करण्यात आले असता न्यायालयाने ६ जानेवारी पर्यंत पोलीस कोठडी सुनावली आहे. अर्षद खान याच्यावर दुर्घटनेच्या केंद्रस्थानी असलेल्या इगो मीडिया प्रायव्हेट लिमिटेड या कंपनीकडून ४६ लाख रुपये घेतल्याचा आरोप आहे. (Ghatkopar Hoarding Accident)

अर्शद खान या गोवंडीतील व्यावसायिकाने इगो मीडियाचे संचालक भावेश भिंडे आणि जान्हवी मराठे यांच्याकडून मोठी रक्कम घेतली होती. अर्षद हा एका आयपीएस अधिकारी आणि रेल्वे पोलीस दलाचे माजी पोलीस आयुक्त यांचा निकटवर्तीय मानला जातो. घाटकोपर होर्डिंग दुर्घटनेत या आयपीएस अधिकाऱ्या चे नाव देखील आले होते. रेल्वे पोलिसांच्या घाटकोपर पूर्व येथील जागेत उभारण्यात आलेली महाकाय बेकायदेशीर होर्डिंग १३ मे २०२३ रोजी जवळच असलेल्या पेट्रोल पंपावर कोसळली होती. (Ghatkopar Hoarding Accident)

(हेही वाचा – Shivaji Park मधील लाल माती काढण्याचा निर्णय तज्ज्ञांच्या अभ्यास अहवालानंतरच!)

या दुर्घटनेत १७ जणाचा मृत्यू झाला होता, आणि शेकडो जण जखमी झाले होते. या प्रकरणी पंतनगर पोलीस ठाण्यात होर्डिंग कंपनी इगो मीडियाचे मालक भावेश भिंडे सह कंपनीचे संचालक, अभियंते यांच्याविरुद्ध गुन्हा दाखल करण्यात आला होता. दरम्यान हा गुन्हा मुंबई गुन्हे शाखेकडे वर्ग करून विशेष तपास पथक गठीत करण्यात आले होते. विशेष तपास पथकाने या प्रकणात भावेश भिंडे, जान्हवी मराठे सह चार जणांना अटक करण्यात आली होती. दुर्घटनाग्रस्त होर्डिंग हे बेकायदेशीर होते, व हे होर्डिंग उभारण्याच्या कामात मोठा आर्थिक व्यवहार झाला होता. त्यात माजी रेल्वे पोलीस आयुक्त यांचे नाव समोर येत होते. (Ghatkopar Hoarding Accident)

आयपीएस अधिकाऱ्याचा निकटवर्ती असलेला अर्षद खान याने ४६ लाख इगो मिडियाकडून घेतले होते. हे पैसे पुढे कुठे गेले त्याचे काय झाले हे कळू शकले नाही. अर्षद खानने पैसे घेतल्याचे तपासात समोर येताच अर्षद खान याला या गुन्ह्यात आरोपी करण्यात आले होते. त्यानंतर अर्षद खान हा फरार झाला होता. त्याने अटकपूर्व जामिनासाठी केलेला अर्ज देखील न्यायालयाने फेटाळला होता. पोलिस अर्षद खान हा शोध घेत होते, मात्र तो पोलिसांच्या तावडीत येत नव्हता. अखेर सोमवारी अर्षद खान याला गुन्हे शाखाने अटक केली. (Ghatkopar Hoarding Accident)

हेही पहा –