Powai Drug Case: ३ कोटींचा ‘चरस’ जप्त एकाला अटक 

मुंबई – पवई पोलिसांनी नुकत्याच केलेल्या एका कारवाईत ३ कोटींचा कश्मिरी चरस (Kashmiri Charas) या अमली पदार्थासह एकाला अटक केली आहे. अटक करण्यात आलेला आरोपी हा सराईत ड्रग्स तस्कर (Drug traffickers) असून यापूर्वी देखील त्याच्याकडे मोठ्या प्रमाणात अमली पदार्थ मिळून आला होता. अशी माहिती पोलिसांनी दिली आहे. या प्रकरणी पवई पोलिसांनी अमली पदार्थ प्रतिबंधक कायदा अंतर्गत गुन्हा दाखल केला असून त्याच्या साथीदारांचा शोध घेण्यात येत आहे.

मोहम्मद सादिक हनिफ सय्यद (४६) असे अटक करण्यात आलेल्या ड्रग्स तस्कराचे नाव आहे.पवई पोलीस ठाण्याचे (Powai Police Station) सपोनि. संतोष कांबळे, पोलीस उपनिरीक्षक शोभराज सरक हे त्यांच्या पथकासह पवईतील निटी पोस्ट, विहार सरोवर येथे गस्त घालत असताना त्या ठिकाणी एक मोटार संशयास्पद रित्या उभी असलेली आढळून आली. पोलीस पथकाने मोटारीत बसलेल्या इसमाला बाहेर काढून त्याच्याकडे चौकशी करीत असताना त्यांच्या संशयास्पद हालचालीमुळे पोलिसांचा त्याच्यावरील संशय अधिकच बळावला, पोलिसांनी त्याच्या मोटारीची झडती घेतली असता ६ किलो ३२ ग्रॅम चरस हा अमली पदार्थ आणि एक गावठी बनावटीचा कट्टा मिळून आला.

पोलीस पथकाने तात्काळ मोहम्मद सादिक (Accused Mohammed Sadiq) याला ताब्यात घेऊन त्याच्याकडे कसून चौकशी असता त्याने आणखी चरस चांदशहावली दर्गा कंपाउंडच्या भिंतीजवळ ठेवल्याची माहिती पोलिसांना दिली. पोलिसांनी दर्गा जवळील भिंतीजवळून ७ किलो १८५ ग्रॅम चरस असा एकूण १३ किलो २१७ ग्रॅम चरस जप्त करण्यात आला, जप्त करण्यात आलेल्या चरसची () आंतरराष्ट्रीय बाजारपेठेत ३ कोटी ३० लाख रुपये किंमत असल्याची माहिती पोलिसांनी दिली. मोहम्मद सादिक याने हा सराईत तस्कर आणि ड्रग्स विक्रेता (Drug dealer) असून त्याच्यावर यापूर्वीचे तीन गुन्हे दाखल आहेत, त्याने हा चरस जम्मू काश्मीर येथून मागवला असावा असा संशय पोलिसांनी व्यक्त केला आहे. हा चरस तो मुंबईत ड्रग्स विक्रेत्याना पुरवणार होता अशी माहिती चौकशीत समोर आली आहे. मोहम्मद हा चरस कुणाला देणार होता त्याचा तपास सुरू आहे. ही कारवाई पवई पोलीस ठाण्याचे वरीष्ठ पोलीस निरीक्षक जितेंद्र सोनवणे, पोलीस निरीक्षक प्रवीण पवार यांच्या मार्गदर्शनाखाली सपोनि. संतोष कांबळे, उपनिरीक्षक शोभराज सरक आणि पथक करीत आहे.