उद्याने ठरतायेत मधुमेहींसाठी वरदान!

मधुमेह संदर्भात व्यापक जनजागृती करून मधुमेहग्रस्त रुग्णांना निरनिराळ्या वैद्यकीय सेवा दिल्या जातातच. त्यासोबत उद्यान विभाग देखील यामध्ये महत्वाचे योगदान देत आहे. मधुमेह व तत्सम आजाराने ग्रस्त नागरिकांना व्यायाम, चालणे, धावणे यांसारख्या आरोग्यदायी सेवा सुविधा मिळाव्यात, म्हणून मुंबई महानगरपालिकेच्या उद्यान विभागाने सुमारे ४८८ खुल्या ठिकाणी व्यायामाची साधने उपलब्ध करून दिली आहेत. बहुतांश उद्यानांमध्ये जॉगिंग ट्रॅक, पदपथ, योगा व ध्यानधारणा केंद्र यांसारख्या सुविधा विनामूल्य उपलब्ध असल्याने मधुमेहग्रस्त नागरिकांसाठी त्या जणू संजीवनीच ठरत आहेत.

सन २०२१-२०२३ ह्या कालावधीकरिता access to diabetes care अर्थात मधुमेह विषयक काळजीसाठी आवश्यक सेवा उपलब्ध होणे, ही संकल्पना जगभरात राबविण्यात येत आहे. दरवर्षी १४ नोव्हेंबर हा दिवस जगभरात जागतिक मधुमेह दिवस म्हणून साजरा केला जातो. मधुमेह हा दीर्घकालीन आजार असून तो बळावला, तर आरोग्याच्या गंभीर समस्यांना सामोरे जावे लागते. कोणत्याही विशिष्ट वयोगटापर्यंत सीमित न राहता हा आजार आता सर्व वयोगटात आढळतो. मधुमेहाची लक्षणे दिसू लागताच जागरूक होऊन आवश्यक ती काळजी घेणे अत्यंत गरजेचे आहे. योग्य आहारासोबत नेटकी जीवनशैली व दिनचर्या तसेच दररोज चालणे, धावणे यासह वैद्यकीय तज्ज्ञांनी सुचवलेले व्यायाम करणे हे महत्त्वाचे ठरते. महानगरपालिकेच्या आरोग्य विभागाच्या माध्यमातून मधुमेह संदर्भात व्यापक जनजागृती करून मधुमेहग्रस्त रुग्णांना निरनिराळ्या वैद्यकीय सेवा दिल्या जातातच. त्यासोबत उद्यान विभाग देखील यामध्ये महत्वाचे योगदान देत आहे. मुंबईसारख्या महानगरात जवळपास सर्वच नागरिकांचा जीवनक्रम अत्यंत धावपळीचा व दगदगीचा असतो. त्यातच महानगराच्या भौगोलिक मर्यादांमुळे प्रत्येकाला व्यायामाच्या सेवा-सुविधा मिळतातच, असे नाही. अशा स्थितीत बृहन्मुंबई महानगरपालिका प्रशासनाने उद्यान विभागाच्या माध्यमातून सर्वसामान्य मुंबईकरांसाठी सर्व परिसरांमध्ये उद्याने, खेळाची मैदाने, मनोरंजन मैदाने यांच्या माध्यमातून सुविधा उपलब्ध करून दिली आहे.

(हेही वाचा : बाळासाहेबांच्या स्मृतीस्थळाचे सुशोभिकरण युद्धपातळीवर सुरु)

सद्यस्थितीत उद्यान विभागाच्या अखत्यारित एकूण १ हजार ०६८ भूभाग आहेत. मागील चार ते पाच वर्षांपासून विविध उद्याने, मनोरंजन मैदाने आणि खेळांची मैदाने येथे खुली व्यायामाची उपकरणे उपलब्ध करून देण्यात येत आहेत. आजपर्यंत सुमारे ४८८ ठिकाणी अशी उपकरणे लावण्यात आली आहेत. त्यात आणखी वाढ करण्याचे निर्देश अतिरिक्त  आयुक्त (पूर्व उपनगरे) अश्विनी भिडे आणि उपायुक्त (उद्याने)  रमाकांत बिरादार यांनी दिले आहेत. महानगरपालिकेच्या बहुतांश उद्यानांचा, मैदानांचा विकास करताना व्यायामाच्या उपकरणांसह जॉगिंग ट्रॅक, पदपथ, योगा आणि ध्यानधारणा केंद्र यांचाही आवर्जून समावेश केला जात आहे. जेणेकरून नागरिकांना सकाळ-सायंकाळ चालणे, धावणे यांसारखे आरोग्यदायी फायदे विनामूल्य व घराजवळ सहजरित्या उपलब्ध झाले पाहिजेत. शहर, पूर्व उपनगरे आणि पश्चिम उपनगरे अशा तीन विभागांमध्ये सर्वत्र या सुविधा नागरिकांना उपलब्ध होतील, याकडे लक्ष दिले जात आहे, अशी माहिती उद्यान अधीक्षक जितेंद्र परदेशी यांनी दिली आहे.