महाराष्ट्राला कोरोना संकटकाळात दिलासा देणारी आनंदवार्ता हाती आली असून, राज्याला विशाखापट्टणम येथून ऑक्सिजन वाहून आणण्यासाठी ७ मोठे टँकर घेऊन जाणारी, देशातील पहिली ‘ऑक्सिजन एक्स्प्रेस’ आज रवाना करण्यात आली. रेल्वे वाहतुकीमार्गे जलदगतीने ऑक्सिजनची वाहतूक व्हावी, अशी मागणी मुख्यमंत्री उद्धव ठाकरे यांनी केंद्र शासनाकडे केली होती. त्याला रेल्वेने प्रतिसाद देताच राज्याने जलदगतीने हालचाली करुन आज पहिली रेल्वे रवाना केली. परिवहन मंत्री अनिल परब यांनी या एक्स्प्रेसला हिरवा दिवा दाखवून रवाना केले.
आणखी ऑक्सिजन एक्स्प्रेस धावणार
या एक्स्प्रेसच्या माध्यमातून येत्या पाच दिवसांत एकशे दहा मेट्रीक टन द्रवरुप ऑक्सिजनचा पुरवठा रेल्वे वाहतुकीच्या माध्यमातून राज्याला होणार आहे. ऑक्सिजन तुटवड्याच्या पार्श्वभूमीवर मुख्यमंत्री उद्धव ठाकरे यांनी सुचवल्याप्रमाणे राज्याच्या प्रशासनाने वेगवेगळ्या पर्यायांची चाचपणी करत रेल्वे मार्गाने ऑक्सिजन वाहतूक करता येईल, असे केंद्र शासनाला सुचवले होते. त्यानुसार ही एक्स्प्रेस चालवण्यास रेल्वेने मंजुरी दिली असून, यापुढील काळात ऑक्सिजनच्या निरंतर पुरवठ्यासाठी रेल्वेच्या मदतीने आणखी ‘ऑक्सिजन एक्स्प्रेस’ चालविण्याचे नियोजन करण्यात येत आहे. त्यामुळे ऑक्सिजन तुटवड्यावर मात करणे शक्य होणार आहे.
(हेही वाचाः 1 मेपासून 18 वर्षांवरील सर्वांना घेता येणार लस… केंद्र सरकारचा मोठा निर्णय!)
आव्हानांवर केली मात
मुख्यमंत्री उद्धव ठाकरे यांच्या निर्देशानुसार, राज्याचा परिवहन विभाग आणि अन्न व औषध प्रशासन विभाग गेल्या आठ दिवसांपासून केंद्र शासन आणि रेल्वे मंत्रालयाकडे यासंदर्भात पाठपुरावा करत होते. ऑक्सिजन वाहतूक करणाऱ्या टँकरचे आकारमान, उंची या अनुषंगाने विद्युतीकरण झालेल्या रेल्वेमार्गावरुन वाहतूक करण्याबाबत काही अडचणी, आव्हाने होती. योग्य आकारमानाच्या टँकरचा शोध घेऊन कळंबोली येथील प्लॅटफॉर्म काही अंशी अपूर्ण असल्याने, बोईसर येथील रेल्वे प्लॅटफॉर्मवरुन रेल्वेच्या सपाट वॅगनवर रिकामे टँकर लोड करुन यशस्वीरित्या चाचणी घेण्यात आली.
असा होणार प्रवास
कळंबोली येथून विशाखापट्टणमकडे ऑक्सिजन एक्स्प्रेस चालविणे अधिक व्यवहार्य असल्याने दोन दिवसांत येथील प्लॅटफॉर्मचे काम पूर्ण करण्यात आले. रविवारी प्रत्यक्ष रिकामे टँकर सपाट वॅगनवर ‘रोल ऑन-रोल ऑफ’ पद्धतीने चढवून संध्याकाळी ७च्या दरम्यान ऑक्सिजन एक्स्प्रेसला रवानाही करण्यात आले. हे प्रत्येकी १६ मेट्रीक टन द्रवरुप ऑक्सिजन वाहतुकीची क्षमता असलेले विशेष टँकर आहेत. आयनॉक्स एअर प्रॉडक्ट्स, ताईयो निप्पॉन सॅन्सो इं., एअर लिक्विड, लिंडे आदी कंपन्यांचे हे टँकर आहेत. नेहमीच्या पुणे-सिकंदराबाद-विजयवाडा रेल्वेमार्गावर पुण्यादरम्यान बोगदे असल्यामुळे ओव्हरहेड वायरची उंची तुलनेत कमी होत असल्याने या मार्गावरुन ऑक्सिजनचे टँकर वाहून नेणे शक्य नव्हते. त्यामुळे तुलनेत लांबचा असला तरी व्यवहार्य असा सूरत-नंदुरबार-जळगाव-नागपूर असा लोहमार्ग निवडण्यात आला आहे.
(हेही वाचाः प्राणवायूच्या दैनंदिन पुरवठ्यावर गुगल ड्राईव्हच्या माध्यमातून होणार देखरेख)
पाच दिवसांत ऑक्सिजन येणार
या एक्स्प्रेसला सिग्नल्सचा कमीत कमी अडथळा येईल, अशा पद्धतीने ‘ग्रीन कॉरिडॉर’ही तयार करण्यात आला असून केवळ दीड दिवसांत ती विशाखापट्टणम येथे पोहोचेल. तेथील ‘राष्ट्रीय इस्पात लि.’ या कंपनीतून दीड-दोन दिवसात द्रवरुप ऑक्सिजन भरुन टँकर लगेच पुन्हा महाराष्ट्राकडे रवाना होतील. अशा पद्धतीने येत्या पाच दिवसांच्या आत सुमारे ११० मेट्रीक टन ऑक्सिजन राज्याला रेल्वे वाहतुकीद्वारे प्राप्त होईल. उच्च वजन क्षमतेमुळे ऑक्सिजन टँकरची वाहतूक रस्तामार्गे करणे तांत्रिकदृष्ट्या व्यवहार्य नव्हते तसेच त्यासाठी प्रदीर्घ वेळ लागला असता. अशी माहिती परिवहन आयुक्त अविनाश ढाकणे यांनी दिली.
Join Our WhatsApp Community