शिंदे सरकारमध्ये देवेंद्र फडणवीस उपमुख्यमंत्री! थेट अमित शहांचे ट्विट 

शिवसेनेमधून ४० आमदारांना फोडून भाजपाच्या समर्थनाने एकनाथ शिंदे हे राज्याचे मुख्यमंत्री होतील आणि आपण सरकारमध्ये न राहता बाहेरून सरकारला सहकार्य करू, अशी घोषणा स्वतः भाजपा नेते देवेंद्र फडणवीस यांनी गुरुवारी, ३० जून रोजी केली. त्यानंतर अवघ्या २ तासांतच देशाचे गृहमंत्री अमित शहा यांनी एकनाथ शिंदेच्या मंत्रिमंडळात देवेंद्र फडणवीस हे उपमुख्यमंत्री असतील, असे ट्विट केल्याने राज्याच्या राजकारणात आणखी एक ट्विस्ट आला आहे.

देवेंद्र फडणवीस यांनी मोठे मन दाखवून महाराष्ट्र राज्य आणि महाराष्ट्रातील जनतेच्या हितासाठी सरकारमध्ये सहभागी होण्याचा निर्णय घेतला आहे. हा निर्णय महाराष्ट्राच्या प्रति खरी निष्ठा व सेवाभावाचा परिचय मिळवून दिला आहे. त्यासाठी त्यांना मनःपूर्वक अभिनंदन करत आहे.

त्यानंतर ‘हा पक्षाचा आदेश आहे तो आदेश आपण पाळत आहे, असे सांगत फडणवीस यांनी हा निर्णय मान्य केला. त्यामुळे राजभवनात मुख्यमंत्री म्हणून एकनाथ शिंदे हे शपथ घेत असतानाच त्यांच्या बरोबर देवेंद्र फडणवीस यांनीही शपथ घेणार आहेत. विशेष म्हणजे पंतप्रधान नरेंद्र मोदी यांनी दोन वेळा फडणवीस यांना फोन करून शिंदे सरकारमध्ये उपमुख्यमंत्री होण्यासाठी सांगितल्याचे सूत्रांकडून समजते.