अंमलबजावणी संचालनालयाने (ईडी) मनी लॉन्ड्रिंग प्रतिबंध कायद्यांतर्गत कट्टर इस्लामिक संघटना पॉप्युलर फ्रंट ऑफ इंडिया (पीएफआय) विरोधात मोठी कारवाई केली आहे. तपास यंत्रणेने इस्लामिक संघटनेची बँक खाती गोठवली आहेत. ईडीच्या अहवालानुसार पीएफआयशी संलग्न करण्यात आलेली 23 खाती आणि 10 खाती आरआयएफ (रिहॅब इंडिया फाऊंडेशन) ची आहेत. या खात्यांमध्ये ६८ लाख ६२ हजार ८१ रुपये आहेत.
मनी लॉन्ड्रिंग अंतर्गत पीएफआय विरुद्ध गुन्हा दाखल
गेल्या महिन्याच्या सुरुवातीला अंमलबजावणी संचालनालयाने (ईडी) PFI नेते अब्दुल रझाक पेडियाक्कल उर्फ अब्दुल रझाक बीपी आणि अश्रफ खदिर उर्फ अश्रफ एमके यांच्याविरुद्ध २२ कोटी रुपयांच्या मनी लॉन्ड्रिंग प्रकरणात खटला दाखल केला. हे दोघेही केरळस्थित पीएफआयचे पदाधिकारी आहेत. आरोपपत्रानुसार, या पीएफआय नेत्यांनी केरळमधील मुन्नारमध्ये परदेशातून मिळणारा निधी पांढरा करण्यासाठी आणि इस्लामिक संघटनेच्या कट्टरपंथी कारवाया करण्यासाठी त्याचा वापर करण्याचा व्यवसाय सुरू केला होता. दोन्ही पीएफआयचे पदाधिकारी संघटनेच्या कथित ‘दहशतवादी गट’ तयार करण्यात गुंतले होते, असा दावाही केला जात आहे. हे दोन आरोपी आणि इतर PFI नेते आणि परदेशी संस्थांशी संबंधित सदस्यांसह, मुन्नारमधील मुन्नार व्हिला व्हिस्टा प्रकल्प (MVV) हा गृहनिर्माण प्रकल्प विकसित करत आहेत. परदेशातून गोळा केलेला पैसा पांढरा करणे हाच त्याचा उद्देश होता. जेणेकरुन PFI च्या अतिरेकाला देशात प्रोत्साहन मिळू शकेल.
(हेही वाचा अनिल देशमुखांच्या अडचणी वाढणार? सचिन वाझे माफीचा साक्षीदार)
असा झालेला पैशाचा व्यवहार!
या वर्षी मार्चमध्ये रझाक, पीएफआयच्या मलप्पुरममधील पेरुमपदाप्पू युनिटचे विभागीय अध्यक्ष कोझिकोड विमानतळावरून देशाबाहेर पळून जाण्याच्या प्रयत्नात असताना पकडले गेले. अश्रफ एमके यांना गेल्या महिन्यात दिल्लीत अटक करण्यात आली होती. ईडीचा दावा आहे की रझाकने यूएईमधून पीएफआयची आघाडीची संस्था रिहॅब इंडिया फाउंडेशनला सुमारे ३४ लाख रुपये हस्तांतरित केले होते. याशिवाय पीएफआयच्या सोशल डेमोक्रॅटिक पार्टी ऑफ इंडिया (एसडीपीआय) या राजकीय शाखेचे नेते एमके फैजी यांच्याकडेही त्यांनी २ लाख रुपये हस्तांतरित केल्याचा आरोप आहे. केंद्रीय तपास एजन्सीनुसार, पीएफआयचे दोन्ही सदस्य अंशद बद्रुद्दीनला (ऑगस्ट २०१८ ते जानेवारी २०२१ पर्यंत) ३.५ लाख रुपये देण्याच्या प्रकरणाशी देखील जोडलेले आहेत. बद्रुद्दीनला यूपी एटीएसने २०२१ मध्ये पीएफआय सदस्य फिरोज खानसह पकडले होते. त्यांच्याकडून घरगुती स्फोटक उपकरणे, ३२ बोअरचे पिस्तूल आणि सात जिवंत गोळ्या जप्त करण्यात आल्या आहेत.
Join Our WhatsApp Community