माळढोकची संख्या वाढवण्यासाठी पुन्हा राजस्थान लक्ष्य

राज्यातील माळढोक पक्ष्याचे अस्तित्व मिटण्यापूर्वी राजस्थानातून माळढोक पक्ष्याला राज्यात आणण्याचा पुनर्विचार वनविभागाने सुरु केला आहे. माळढोक पक्ष्यासाठी खास ओळखल्या जाणाऱ्या सोलापुरात नानौज माळढोक पक्षी अभयारण्यात राजस्थानातून पक्ष्याची पिल्ले आणून पाळायची यासाठी प्राथमिक स्तरावर तयारी सुरु झाली आहे. हा प्रस्ताव नागपुरातील वनविभागाच्या मुख्य कार्यालयात मंजुरीसाठी लवकरच पाठवला जाणार आहे.

नानौज माळढोक अभयारण्यात आढळून येणाऱ्या मादी माळढोक पक्ष्याच्या सुरक्षिततेसाठी पाच वनरक्षक आणि प्रमुख मिळून चोवीस तास देखरेख ठेवली जाईल. त्यासाठी खास चौकी उभारली जाणार आहे. ती सध्या गौत्रे आणि शिवाजीनगर परिसरात हिंडत आहे. सोयाबीनच्या पिकांवर येणारी किडे तिचे प्रमुख खाद्य आहे. मात्र गरुड पक्ष्याला पाहताच ती घाबरते.