राज्यातील दिव्यांग शाळेतील कर्मचाऱ्यांना गुड न्यूज!

या प्रश्नावर अत्यंत सकारात्मक चर्चा करत सामाजिक न्याय मंत्री धनंजय मुंडे व राज्यमंत्री डॉ. विश्वजित कदम यांनी सातवा वेतन आयोग लागू करण्यासंदर्भातील माहिती सभागृहाला दिली.

राज्यातील दिव्यांग शाळेतील शिक्षक व शिक्षकेतर कर्मचारी वर्गास राज्याचे सामाजिक न्याय व विशेष सहाय्य मंत्री धनंजय मुंडे यांनी अर्थसंकल्पीय अधिवेशनातून मोठी ‘गुड न्यूज’ दिली आहे. विधानपरिषदेतील प्रश्नोत्तराच्या तासात मुंडेंनी दिव्यांग शाळेतील शिक्षक-कर्मचाऱ्यांना सातवा वेतन आयोग लागू करण्याची अंमलबजावणी, दोन महिन्यांच्या आत करण्यात येणार असल्याची घोषणा केली आहे.

धनंजय मुंडे यांची माहिती

शिक्षकांना देण्यात येणारे समकक्ष वाढीव अनुदान, भत्ते यांसह अन्य प्रश्नी अर्थ व नियोजन खात्याचे मंत्री अजितदादा पवार यांच्यासह अन्य विभागांसमवेत व्यापक बैठका घेऊन, सातव्या वेतन आयोगाच्या शिफारशी लागू करण्यासंदर्भातील सर्व अडसर दूर करुन, दोन महिन्यांच्या आत सातवा वेतन आयोग लागू करण्यात येईल, अशी माहिती धनंजय मुंडे यांनी विधानपरिषदेत बोलताना दिली. डॉ. सुधीर तांबे, शरद रणपिसे, भाई जगताप, जयंत पाटील, कपिल पाटील, विक्रम काळे यांसह विरोधीपक्षनेते प्रवीण दरेकर यांनी याबाबत विधानपरिषदेत प्रश्न उपस्थित केला होता. या प्रश्नावर अत्यंत सकारात्मक चर्चा करत सामाजिक न्याय मंत्री धनंजय मुंडे व राज्यमंत्री डॉ. विश्वजित कदम यांनी सातवा वेतन आयोग लागू करण्यासंदर्भातील माहिती सभागृहाला दिली.

(हेही वाचाः ओबीसी आरक्षणाच्या सर्वोच्च न्यायालयाच्या निर्णयावर काय आहे राज्य सराकरची भूमिका?)

दोन महिन्यांच्या आत अंमलबजावणी

काँग्रेस नेते भाई जगताप, जयंत आसगावकर यांनी सहावा वेतन आयोग लागू झाल्यानंतर, सातव्या वेतन आयोग लागू करण्यादरम्यानच्या कालावधीत आलेल्या अडचणींच्या संदर्भात मंत्री महोदयांचे लक्ष वेधले. त्यावेळी दिव्यांग शाळेतील शिक्षकांना अन्य शिक्षकांच्या तुलनेत मिळणारे शंभर रुपये वाढीव अनुदान व त्यातील समकक्ष दुवे यातील फरक स्पष्ट करत, हे अडसर दूर व्हावेत व दिव्यांग शाळेतील शिक्षक व शिक्षकेतर कर्मचाऱ्यांना अन्य विभागातील कर्मचाऱ्यांप्रमाणे सातव्या वेतन आयोगाच्या शिफारशीनुसार, वेतन मिळावे यासाठी अर्थ व नियोजन खात्यासह संबंधित विभागांसोबत व्यापक बैठक घेण्याची आवश्यकता असल्याचे सांगितले. अधिवेशनानंतर पंधरा दिवसांच्या आत संबंधित विभागांसोबत व्यापक बैठक घेऊन हे अडसर दूर करुन, येत्या दोन महिन्यांच्या आत सातव्या वेतन आयोगाची अंमलबजावणी करण्यात येणार असल्याचे, मुंडेंनी विधानपरिषदेत घोषित केले.

दिव्यांग विशेष ज्युनिअर कॉलेजसाठी सरकार सकारात्मक

दिव्यांग शाळांमधील दहावी पास झालेल्या बऱ्याच विद्यार्थ्यांना, मुख्यतः कर्णबधीर विद्यार्थ्यांना अकरावी प्रवेशासाठी अडचणींना सामोरे जावे लागते, यावर राज्य शासन अकरावी व बारावीच्या विद्यार्थ्यांना विशेष ज्युनिअर कॉलेज उपलब्ध करून देणार का, हा प्रश्न उपस्थित करत कपिल पाटील यांनी सभागृहाचे लक्ष वेधले. धनंजय मुंडे यांनी राज्य सरकार दिव्यांग विद्यार्थ्यांना विशेष ज्युनिअर कॉलेज उपलब्ध करुन देण्याबाबत सकारात्मक असून, याबाबत अर्थसंकल्पीय अधिवेशनानंतर मंत्रिमंडळ बैठकीत प्रस्ताव मांडणार असल्याचे प्रतिपादन सभागृहात केले.

(हेही वाचाः ऑक्सफर्ड विद्यापीठात हिंदुद्वेष, विद्यार्थी नेत्या रश्मी सामंतची मानसिक छळवणूक!)

प्रतिक्रिया द्या

Please enter your comment!
Please enter your name here