रुपाली पाटील यांनी ‘इंजिन’ सोडलं! हाती बांधणार ‘घड्याळ’?

गेल्या दोन दिवसांपासून मनसे अध्यक्ष राजठाकरे हे महाराष्ट्र दौऱ्यावर आहेत. दरम्यान, राज ठाकरेंच्या पुणे दौऱ्यापूर्वीच मनसेला मोठा धक्का बसला आहे. मनसेच्या माजी नगरसेविका आणि प्रवक्त्या रुपाली पाटील यांनी मनसेच्या सदस्यत्वाचा राजीनामा दिला आहे. रुपाली पाटील यांनी पक्षातील सर्व पदांचा आणि पक्षाच्या प्राथमिक सदस्यत्वाचाही राजीनामा दिला आहे. मनसे नेते अनिल शिदोरे यांच्याकडे त्यांनी हा राजीनामा दिला असल्याची माहिती आहे.

…म्हणून दिला राजीनामा

रुपाली पाटील यांच्याकडे मनसेच्या महिला प्रदेश उपाध्यक्षपदाची जबाबदारी होती. मात्र, गेल्या काही दिवसांपासून पक्षांतर्गत वादामुळे त्या नाराज होत्या. त्यामुळे त्या मनसे पक्षाला ‘जय महाराष्ट्र’ करतील, अशी शक्यता व्यक्त केली जात होती. या राजीनाम्यानंतर रूपाली पाटील यांची पुढची रणनिती काय असणार, याकडे साऱ्यांचे लक्ष लागून आहे. दरम्यान ते आज पत्रकार परिषद घेऊन आपली भूमिका मांडण्याची शक्यता असल्याचे सांगितले जात आहे.

(हेही वाचा –बांगडी, हेल्मेट, मायक्रोओव्हन, स्टेथोस्कोपमधून ड्रग्स तस्करी)

अजित पवारांच्या उपस्थितीत हाती घड्याळ बांधणार

सूत्रांनी दिलेल्या माहितीनुसार, रुपाली पाटील यांनी मनसेचा राजीनामा दिल्यानंतर त्या आता राष्ट्रवादी काँग्रेसमध्ये प्रवेश करण्याची शक्यता व्यक्त केली जात आहे. राष्ट्रवादीचे पुणे शहराध्यक्ष प्रशांत जगताप यांच्याशी त्यांची चर्चा झाली आहे. जगताप यांनी दिलेल्या माहितीनुसार येत्या शुक्रवारी रुपाली पाटील या उपमुख्यमंत्री अजित पवार यांच्या उपस्थितीत राष्ट्रवादी काँग्रेसमध्ये प्रवेश करण्याची शक्यता व्यक्त केली जात आहे.