शिवसेनेचे मुख्य नेते आणि राज्याचे उपमुख्यमंत्री एकनाथ शिंदे (DCM Eknath Shinde) यांच्या नेतृत्वावर विश्वास ठेवत आज उबाठा (UBT) गटाच्या शेकडो पदाधिकाऱ्यांनी शिवसेनेत पक्षप्रवेश केला. मुंबईतील एका विशेष समारंभात हा प्रवेश सोहळा पार पडला. या प्रवेशाने उबाठा (UBT) गटाला मोठा फटका बसला असून, शिवसेना अधिक बळकट झाली आहे.
यावेळी उबाठा (UBT) गटाचे हिमाचल प्रदेशचे राज्य प्रमुख नरेश कुमार संजू, युवासेना प्रभारी दिशाल संजू आणि जम्मू-काश्मीरचे उपराज्य प्रमुख महेंद्र पाल शर्मा यांनीही शिवसेनेत प्रवेश केला. याशिवाय नागपूरमधील काँग्रेस नेते सतीश चतुर्वेदी यांचे सुपुत्र व उबाठा गटाचे माजी विधान परिषद सदस्य दुष्यंत चतुर्वेदी यांनी शिवसेनेत प्रवेश करत, विदर्भात पक्षाला मजबूत करण्याचा निर्धार व्यक्त केला.
(हेही वाचा – New LTC Rule : सरकारी कर्मचाऱ्यांना तेजस, वंदे भारतमध्येही लागू होणार एलटीसी)
उबाठाला नाशिक जिल्ह्यातील मोठा फटका
शिवसेनेच्या नाशिकमधील निफाड व दिंडोरी तालुक्यातील उबाठा गटाच्या २०० हून अधिक पदाधिकाऱ्यांनी आज पक्षप्रवेश केला. यामध्ये दिंडोरीतील ३६ प्रमुख पदाधिकारी प्रवीण जाधव, नाना मोरे, रघुनाथ आहेर, अरुण कड, कैलास पगारे यांचा समावेश आहे. निफाडमधून २१ प्रमुख पदाधिकाऱ्यांनी भगवा झेंडा हाती घेतला. यात राजेश पाटील, निलेश पाटील, सुधीर कराड, किरण लभडे आणि सुजित मोरे यांचा समावेश आहे.
कल्याणमधील उबाठा आणि अल्पसंख्याक नेत्यांचा प्रवेश
कल्याण-डोंबिवली परिसरातील एमआयएमचे माजी नगरसेवक तांझिला आयाज मौलवी, अल्पसंख्याक विभागाचे अध्यक्ष आयाझ गुलजार मौलवी, उपाध्यक्ष शारजिल अन्सारी, विधानसभा प्रमुख शाहिद खान, शेख मोहम्मद अन्सारी यांच्यासह अनेक कार्यकर्ते शिवसेनेत सामील झाले.
(हेही वाचा – मुंबईच्या आरोग्य क्षेत्रात तर KEM चे नाव अग्रगण्य, मुख्यमंत्र्यांनी काढले गौरवोद्गार)
महायुतीला अधिक बळ
महायुतीच्या नेतृत्वाखालील सरकार स्थापन झाल्यानंतर महिनाभरात विविध पक्षातील शेकडो कार्यकर्त्यांनी शिवसेनेत प्रवेश केला आहे. विधानसभेच्या निवडणुकीत शिवसेनेने ५७ आमदार निवडून आणले असून, हा विजय पक्षाची लोकप्रियता वाढत असल्याचा पुरावा आहे.
उपमुख्यमंत्री एकनाथ शिंदे यांचे विधान
उपमुख्यमंत्री एकनाथ शिंदे यांनी या प्रसंगी बोलताना सांगितले की, “शिवसेना फक्त एक पक्ष नाही, तर ती विचारधारा आहे. आज मोठ्या संख्येने कार्यकर्त्यांनी शिवसेनेत प्रवेश केल्याने पक्षाची ताकद वाढली आहे. येत्या काळात महाराष्ट्राच्या प्रगतीसाठी शिवसेना ठामपणे काम करत राहील.”
(हेही वाचा – Kho Kho World Cup : खो खो विश्वचषकात महिला व पुरुष संघांचा उपान्त्य फेरीत मुकाबला दक्षिण आफ्रिकेशी)
प्रमुख उपस्थिती
या समारंभास खासदार नरेश म्हस्के, शिवसेना सचिव भाऊसाहेब चौधरी, माजी नगरसेवक राम रेपाळे, उपनेते विजय करंजकर, सहसंपर्क प्रमुख सुनील पाटील, नाशिक जिल्हा प्रमुख भाऊलाल तांबडे, महानगर प्रमुख प्रविण तिदमे यांच्यासह शिवसेनेचे वरिष्ठ पदाधिकारी आणि कार्यकर्ते मोठ्या संख्येने उपस्थित होते.
शिवसेनेला मिळणारा नवा जोर
या पक्षप्रवेशामुळे शिवसेनेला नागपूर, नाशिक, कल्याण, परभणी, बीड, सायन, मुलुंड आदी भागांमध्ये मोठा आधार मिळेल, असा विश्वास व्यक्त करण्यात आला. विशेषतः विदर्भ आणि उत्तर महाराष्ट्रातील संघटनात्मक ताकद वाढल्याने पक्ष आगामी निवडणुकींसाठी सज्ज झाला आहे.
हेही पहा –
Join Our WhatsApp Community