-
प्रतिनिधी
परभणी जिल्ह्यातील शिवसेना उबाठा आणि राष्ट्रवादी काँग्रेस (शरदचंद्र पवार) गटातील अनेक प्रमुख नेते आणि कार्यकर्त्यांनी बुधवारी भारतीय जनता पार्टीत (BJP) प्रवेश केला. यामध्ये पूर्णा बाजार समितीचे सभापती बालाजी खैरे, पाथरी पंचायत समितीचे माजी सभापती अरुण कोल्हे, परभणी जिल्हा मध्यवर्ती बँकेचे संचालक बालाजी देसाई यांच्यासह अनेक पदाधिकारी आणि कार्यकर्त्यांचा समावेश आहे. हा पक्षप्रवेश कार्यक्रम भाजपा प्रदेश कार्याध्यक्ष रवींद्र चव्हाण, राज्यमंत्री मेघना बोर्डीकर-साकोरे, ज्येष्ठ नेते रामप्रसाद बोर्डीकर, भाजपा प्रदेश सरचिटणीस आ. विक्रांत पाटील आणि प्रदेश माध्यम विभाग प्रमुख नवनाथ बन यांच्या उपस्थितीत पार पडला.
या प्रवेशामागील उद्देश स्पष्ट करताना रवींद्र चव्हाण म्हणाले, “विकसित भारत आणि विकसित महाराष्ट्राचे स्वप्न साकार करण्यासाठी हे नेते आणि कार्यकर्ते भाजपात (BJP) सामील झाले आहेत. त्यांच्या अनुभवाचा आणि जनसंपर्काचा पक्षाला निश्चितच फायदा होईल.” तर राज्यमंत्री मेघना बोर्डीकर-साकोरे यांनी विश्वास व्यक्त केला की, “शिवसेना उबाठा आणि शरद पवार गटातील प्रमुख नेत्यांच्या प्रवेशामुळे परभणी जिल्ह्यात भाजपाची ताकद वाढेल. लवकरच संपूर्ण जिल्हा भाजपामय होईल.”
(हेही वाचा – ‘आरबीआय’च्या उपगव्हर्नरपदी Poonam Gupta यांची नियुक्ती)
भाजपात (BJP) प्रवेश करणाऱ्या नेत्यांमध्ये पूर्णा बाजार समितीचे उपसभापती नारायणराव पिसाळ, माजी उपसभापती लक्ष्मण बोबडे, संतराम ढोणे, रमेशराव काळबांडे, जिल्हा परिषदेचे माजी सदस्य विश्वनाथ सोळके, पाथरी पंचायत समितीचे माजी सभापती माणिक घुंबरे आणि बालाजी डाखोरे यांचा समावेश आहे. याशिवाय, विविध सेवा सहकारी संस्थांचे ६० अध्यक्ष आणि जिल्ह्यातील ४० सरपंचांनीही भाजपात प्रवेश केला. या मोठ्या संख्येने झालेल्या पक्षप्रवेशामुळे परभणी जिल्ह्यातील राजकीय समीकरणांवर परिणाम होण्याची शक्यता आहे.
हा पक्षप्रवेश कार्यक्रम परभणी जिल्ह्यातील भाजपाच्या वाढत्या प्रभावाचे द्योतक मानला जात आहे. शिवसेना उबाठा आणि शरद पवार गटातील नेत्यांचे हे पलायन महाविकास आघाडीला धक्का देणारे ठरू शकते, तर दुसरीकडे भाजपाला (BJP) स्थानिक पातळीवर आपली पकड मजबूत करण्याची संधी मिळाली आहे. येत्या काळात या घडामोडींचा जिल्ह्याच्या राजकारणावर कसा परिणाम होतो, हे पाहणे महत्त्वाचे ठरेल.
हेही पहा –
Join Our WhatsApp Community