NCP : नव्या संसद भवनात शरद पवार आणि प्रफुल्ल पटेल यांची भेट, एकत्र फोटो काढले; चर्चेला उधाण

एकीकडे अजित पवारांनी सत्तेत सहभागी होत वेगळी भूमिका घेतली आहे. राष्ट्रवादी काँग्रेस पक्षात (NCP) उभी फूट पडली. दोन्ही गटांमध्ये आता कायदेशीर लढाई होणार आहे. निवडणूक आयोगात पुढच्या काही दिवसांमध्ये प्रत्यक्ष सुनावणीला सुरुवातही होणार आहे. यातच प्रफुल्ल पटेल आणि शरद पवार यांची भेट झाल्याने घटनेमुळे राजकीय वर्तुळात वेगवेगळ्या चर्चांना उधाण आले आहे.

शरद पवार आणि प्रफुल्ल पटेल यांची राज्यसभेत कॅफेटेरिया येथे भेट झाली आहे. यावेळी राष्ट्रवादी काँग्रेसच्या खासदार वंदना चव्हाण, ठाकरे गटाच्या खासदार प्रियांका चतुर्वेदी या देखील उपस्थित होत्या. या सर्व नेत्यांनी नवीन राज्यसभा सभागृहात एकत्रित फोटो काढला, हा फोटो प्रफुल्ल पटेल यांनी ट्विटवरून  शेअर केला आहे.

(हेही वाचा Lashkar E Taiba : अनंतनागच्या कोकरनागमध्ये लष्कर-ए-तैयबाच्या कमांडरचा केला खात्मा)

नवीन संसद भवनातील ऊर्जा दिवस! राज्यसभेचे चेंबर हे एक चमत्कार आहे. हा क्षण आदरणीय शरद पवार साहेबांसोबत शेअर केल्याने तो आणखीनच खास बनला. कॅफेटेरियामध्ये मित्रांसह काही स्नॅक्स आणि सौहार्दाचा आस्वाद घेतला. खरोखरच लक्षात राहावा असा आजचा दिवस, असे प्रफुल्ल पटेल म्हणाले आहेत. त्यांनी Xवर फोटो शेअर करत या भावना व्यक्त केल्या आहेत.

प्रफुल्ल पटेल आणि शरद पवार यांच्या भेटीमुळे चर्चांना उधाण आले आहे. विशेष म्हणजे अजित पवार गटाच्या सर्व आमदारांनी याआधीदेखील शरद पवार यांची भेट घेतली. त्यांनी शरद पवार यांना सत्तेत सहभागी होण्याची विनंती केली होती. पण शरद पवार आपल्या भूमिकेवर ठाम राहत आपण विरोधातच राहणार असे सांगत सत्ताधाऱ्यांच्या विरोधात शड्डू ठोकला आहे. शरद पवार राज्यातील वेगवेगळ्या जिल्ह्यांध्ये जावून सत्ताधाऱ्यांवर निशाणा साधत आहेत. शरद पवार सत्ताधाऱ्यांवर टीका करत असताना प्रफुल्ल पटेल आणि शरद पवार यांच्या भेटीमुळे राष्ट्रवादीतील फूट फक्त देखावा तर नाही ना? अशी चर्चा राजकीय वर्तुळात रंगली आहे.