अयोध्येतून येणार २,५०० कार्यकर्ते, बंदोबस्ताला २ हजार पोलीस; राज ठाकरेंच्या सभेची अशी तयारी

महाराष्ट्र नवनिर्माण सेनेचे अध्यक्ष राज ठाकरे यांच्या औरंगाबद सभेला अखेर औरंगाबाद पोलिसांनी परवानगी दिली असल्याची माहिती सुत्रांकडून मिळत आहे. त्यामुळे १ मे रोजी मनसेची सभा निश्चित होणार असल्याचे सांगितले जात आहे. राज ठाकरेंनी भोंगे उतरविण्याबाबत राज्य सरकारला ३ मेपर्यंतचा अल्टीमेटम दिला आहे. ही डेडलाईन संपण्यापूर्वीच १ मे रोजी औरंगाबादेत राज ठाकरेंची सभा होणार असून या सभेसाठी अयोध्येतून तब्बल अडीच हजार कार्यकर्ते दाखल होणार असल्याचे सांगितले जात आहे. तर या सभेसाठी कडेकोट बंदोबस्त तैनात करण्यात आला आहे. मिळालेल्या माहितीनुसार ८ डिसीपींसह तब्बल २ हजार पोलिसांचा फौजफाटा असणार आहे.

महाराष्ट्रच नाही तर थेट अयोध्येतून राज समर्थक येणार

औरंगाबादमधील मनसेचे सरचिटणीस दिलीप धोत्रे यांनी प्रसार माध्मयांशी संवाद साधला. यावेळी ते म्हणाले, राज ठाकरे यांच्या या सभेसाठी अयोध्येतून अडीच हजार कार्यकर्ते दाखल होणार असल्याचे राजसभा ही रेकॉर्डब्रेक होणार असून या सभेसाठी अयोध्येतून देखील अडीच हजार कार्यकर्ते येणार आहेत, आम्ही त्यांच्या संपर्कात आहोत. दरम्यान, राज ठाकरे यांच्या या सभेसाठी केवळ मराठवाडा, महाराष्ट्रच नाही तर थेट अयोध्येतून देखील राज समर्थक येणार असल्याची माहिती दिलीप धोत्रे यांनी यावेळी दिली आहे. राज ठाकरेंच्या सभेची पुर्वतयारी व पदाधिकाऱ्यांच्या बैठकांसाठी मनसेचे नेते बाळा नांदगांवकर, नितीन सरदेसाई व दिलीप धोत्रे हे औरंगाबादेत दाखल झाले आहेत.