- विशेष प्रतिनिधी, मुंबई
वातावरणीय बदलांमुळे हवेच्या दर्जात होणारे बदल, त्यातून जनजीवनावर होणारे विपरीत परिणाम लक्षात घेता, मुंबई महानगरपालिकेने प्रमाणित कार्यपद्धतीसह उपाययोजनांच्या अंमलबजावणीवर भर दिला आहे. त्यामध्ये रस्ते स्‍वच्‍छतेचाही समावेश आहे. सद्यस्थितीत २४ प्रशासकीय विभागांमध्‍ये ट्रक माऊंट फॉग मिस्‍ट कॅनॉन संयंत्रांद्वारे पाणी फवारणी केली जात आहे. या सोबतच रस्ते ब्रशिंग करून, पाण्‍याने धुवून काढण्‍यासाठी १०० टॅंकर तैनात करण्यात आले आहेत. त्‍याद्वारे धूळ प्रतिबंध उपाययोजना केली जात असल्याची माहिती महापालिका प्रशासनाने दिली आहे.
वातावरणातील बदलांमुळे मुंबई शहर आणि उपनगरातील हवेच्या गुणवत्तेवर विपरित परिणाम होऊन वायू प्रदूषणात (Air Pollution) वाढ होत असल्याचे निदर्शनास येत आहे. या पार्श्वभूमीवर, वायू प्रदूषण नियंत्रणासाठी मुंबई महानगरपालिकेच्या वतीने मार्गदर्शक तत्वे आणि प्रमाणित कार्यपद्धती यापूर्वीच लागू करण्यात आलेली आहे. त्यामध्ये बांधकामांशी संबंधित बाबींचाही समावेश आहे. आता महानगरपालिका प्रशासनाने त्याहीपुढे जाऊन वायू प्रदूषणासाठी कारणीभूत ठरत असलेल्या छोट्यामोठ्या घटकांवरही अधिक लक्ष केंद्रीत केले आहे.
(हेही वाचा – Sandeep Naik करणार भाजपामध्ये घरवापसी?)
मुंबईतील वायू प्रदूषण (Air Pollution) नियंत्रणात आणण्यासाठी महानगरपालिका आयुक्त तथा प्रशासक भूषण गगराणी यांच्या निर्देशानुसार, अतिरिक्त आयुक्त (पश्चिम उपनगरे) डॉ. विपिन शर्मा, अतिरिक्त आयुक्त (शहर) डॉ. अश्विनी जोशी यांच्या मार्गदर्शनात विविध उपाययोजना केल्या जात आहेत. याच पार्श्वभूमीवर, बांधकामाच्या ठिकाणी धूळ प्रदूषण रोखण्यासाठी प्रयत्न केले जात आहेत, जेणेकरुन वायू प्रदूषण होणार नाही. रस्त्यालगत सुरू असलेल्या बांधकामांमुळे निर्माण होणारी धूळ, जी प्रामुख्याने प्रदूषणास कारणीभूत ठरते, ती नियंत्रित करण्यासाठी मुंबई महानगरपालिकेने कठोर उपाययोजना लागू केल्या आहेत.
महानगरपालिकेच्या सर्व विभागांनी एकत्रित येऊन वायू प्रदूषण आणि वातावरणीय बदलाचे परिणाम ओळखून त्यावर एकसंघपणे कार्यवाही सुरू केली आहे. त्‍यात, पर्यावरण आणि वातावरणीय बदल विभाग, घनकचरा व्‍यवस्‍थापन विभाग, इमारत प्रस्‍ताव विभाग, रस्ते व वाहतूक विभाग आणि प्रशासकीय विभाग कार्यालय यांचा समावेश आहे. महानगरपालिकेच्या प्रत्येक प्रशासकीय विभाग कार्यालयाने (वॉर्ड) आपल्या कार्यक्षेत्रात वायू प्रदूषण (Air Pollution) कमी करण्यासाठी स्थानिक गरजानुरुप उपाययोजना आखल्‍या आहेत.
(हेही वाचा – Police Officers Transfer : घरवापसीनंतरही मुंबईतील वरिष्ठ पोलीस निरीक्षक झाडाखाली)
महापालिकेच्या २४ प्रशासकीय विभागांमध्‍ये ट्रक माऊंट फॉग मिस्‍ट कॅनॉन संयंत्रांद्वारे दोन पाळ्यांमध्ये(शिफ्ट) पाणी फवारणी केली जात आहे. ज्‍या ठिकाणी बांधकाम, पाडकाम, खोदकाम सुरू आहे, अशा ठिकाणी प्रकर्षाने पाणी फवारणी केली जात आहे. वॉर्डातील दुय्यम अभियंता (पर्यावरण) विविध विभागांशी समन्‍वय साधून दररोज स्‍थळ पाहणी करून वाहनांचे मार्ग निश्चित करतात. या सोबतच रस्ते ब्रशिंग करून पाण्‍याने धुवून काढण्‍यासाठी १०० टॅंकर तैनात करण्यात आले आहेत. त्‍यात ५ हजार लीटर क्षमतेच्‍या ६७ आणि ९ हजार लीटर क्षमतेच्‍या ३९ टॅंकरचा समावेश आहे. रस्ते, पदपथ स्‍वच्‍ठतेसाठी ई-स्‍वीपर संयंत्राचा अवलंब करण्यात येत आहे. जेणेकरून धूळीस प्रतिबंध करणे शक्‍य होईल.
खुल्या जागेत किंवा मोकळ्या जागेत बांधकामाच्या साहित्यावर नियमितपणे पाणी फवारणी होत असल्याची खातरजमा केली जात आहे. विनापरवाना अथवा बेकायदेशीर राडारोडा वाहतूक करणाऱ्या, तसेच वाहनावर आच्छादन न टाकता सुरक्षेची कोणतीही उपाययोजना न करणाऱ्या वाहनांवर कारवाई केली जात आहे. मुंबई हे आंतरराष्ट्रीय महानगर आहे. याठिकाणी सतत पर्यटकांचा राबता असतो. त्यामुळे या महानगराची प्रतिमा जागतिक पातळीवरही स्वच्छ राहावी यासाठी मुबई महानगरपालिका सतत प्रयत्नशील आहे. वायू प्रदूषण (Air Pollution) कमी करण्यासाठी महानगरपालिकेचे निरनिराळे प्रयत्न सुरू आहेत. महानगरपालिकेच्या प्रयत्‍नांना बांधकाम व्‍यावसायिकांचेही सहकार्य लाभत आहे. बांधकामाच्या ठिकाणी धूळीचे कण निर्माण होण्यास कारणीभूत ठरणारा राडारोडा तथा अन्य साहित्यावर सातत्याने आणि न चुकता पाण्याची फवारणी केली जात आहे. स्प्रिंकलर्स आणि स्थिर तथा फिरत्या अँटी स्मॉग गनचा वापर केला जात आहे. बांधकाम प्रकल्पस्थळी बाहेर पडण्याच्या ठिकाणी वाहनांची चाके धुण्याची सुविधा बंधनकारक करण्यात आली आहे.
हेही पहा –
Join Our WhatsApp Community