संजय गांधी राष्ट्रीय उद्यानात कचरा टाकण्याच्या प्रकरणी TMC ला हरित लवादाकडून नोटीस

संजय गांधी राष्ट्रीय उद्यानाच्या (SGNP) इको-सेंसिटिव्ह झोन (ESZ) आणि सीआरझेड क्षेत्रात (CRZ) मोठ्या प्रमाणात होत असलेल्या बेकायदेशीर कचरा टाकण्याच्या प्रकरणी राष्ट्रीय हरित लवादाने (NGT) ठाणे महापालिकेला (TMC)  नोटीस बजावली आहे. हा मुद्दा अॅड. वैभव साटम यांनी उपस्थित केला असून, यासंदर्भात ठाणे महापालिकेने कोणतीही ठोस कारवाई का केली नाही, याचे स्पष्टीकरण मागितले आहे.

ठाण्यातील गायमुख जकात नाका, घोडबंदर रोड परिसरात मोठ्या प्रमाणात कचरा टाकला जात असून, हे संपूर्णतः पर्यावरण संरक्षण कायदा, १९८६, सीआरझेड नियमन क्षेत्र अधिसूचना, २०११, तसेच इको-सेंसिटिव्ह झोन मार्गदर्शक तत्त्वांचे उल्लंघन आहे. अशा रीतीने बेकायदेशीर कचरा टाकण्यामुळे नैसर्गिक परिसंस्थेचे मोठे नुकसान होत असून, येथील जैवविविधता, जलस्रोत आणि वन्यजीव धोक्यात आले आहेत.

(हेही वाचा देशमुख यांच्या हत्येतील सर्व आरोपींवर कारवाई होणारच; CM Devendra Fadnavis यांची ग्वाही)

ठाणे महानगरपालिका (TMC), महाराष्ट्र प्रदूषण नियंत्रण मंडळ (MPCB), महाराष्ट्र तटीय झोन व्यवस्थापन प्राधिकरण (MCZMA) आणि मीरा-भाईंदर महानगरपालिका (MBMC) यांना यापूर्वीच कायदेशीर नोटीस, छायाचित्रे आणि तक्रारी सादर करण्यात आल्या होत्या. तथापि, कोणतीही ठोस कारवाई करण्यात आलेली नाही, त्यामुळे प्रशासनाच्या भूमिकेवर गंभीर प्रश्नचिन्ह निर्माण झाले आहे.

NGT च्या नोटीसनंतर अॅड. वैभव साटम यांनी तातडीने उपाययोजना करण्याची मागणी केली असून महापालिकेने कोणती कृती करावी, याविषयी काही मुद्दे सुचवले आहेत. त्यामध्ये गैरकायदेशीर कचरा टाकण्याची प्रक्रिया त्वरित थांबवावी. जबाबदार व्यक्तींवर कठोर कारवाई करावी आणि दंडात्मक उपाययोजना कराव्यात. पर्यावरण संरक्षण कायद्यांनुसार भविष्यात असे प्रकार टाळण्यासाठी ठोस उपाययोजना कराव्यात. महापालिकेने (TMC) या संदर्भात झालेल्या कारवाईचा सविस्तर अहवाल सादर करावा. कायद्याचे उल्लंघन केल्यास कठोर कारवाई करावी, अशी मागणी अॅड. वैभव साटम यांनी केली आहे. NGT च्या हस्तक्षेपामुळे महापालिका आणि संबंधित अधिकाऱ्यांची जबाबदारी ठरवली जाईल आणि ठाणे शहरातील पर्यावरणीय संवेदनशील क्षेत्रांचे संरक्षण करण्यासाठी ठोस पावले उचलली जातील.