होळी (Holi) सणासाठी मोठ्या प्रमाणात वृक्षतोड केली जात असल्याने या सणासाठी वृक्षतोड करू नये अशा प्रकारचे आवाहन महापालिकेच्यावतीने करण्यात आले आहे. महापालिकेच्या आवाहनानंतरही जर नागरिकांकडून वृक्षतोड केल्याचे आढळून आल्यास याबाबत पोलिसांत तक्रार दाखल करण्यात येईल, असे मुंबई महानगरपालिकेच्या वतीने कळविण्यात येत आहे. मात्र, पोलिसांत तक्रार झाल्यास एक आठवडा ते एक वर्षापर्यंत कैदेची शिक्षाही होऊ शकते.
येत्या गुरुवार, १३ मार्च २०२५ रोजी होळी (Holi) सण साजरा करण्यात येणार आहे. या सणाच्या कालावधीत वृक्षतोड होत असल्याचे आढळल्यास सतर्क नागरिकांनी मुंबई महानगरपालिका अधिकाऱ्यांना व स्थानिक पोलिस ठाण्यास कळवावे किंवा महानगरपालिकेच्या ‘१९१६’ या ‘टोल फ्री’ क्रमांकावर संपर्क करावा, असे आवाहन मुंबई महानगरपालिकेचे उद्यान अधीक्षक तथा वृक्ष प्राधिकरणाचे सदस्य सचिव जितेंद्र परदेशी यांनी प्रशासनाच्या वतीने केले आहे.
(हेही वाचा Pakistan चे पोलीस, लष्कर, आयएसआयचे अधिकारी प्रवास करत असलेली जाफर एक्स्प्रेस केली हायजॅक)
‘महाराष्ट्र (नागरी क्षेत्र) वृक्ष संरक्षण व संवर्धन अधिनियम, १९७५’ अंतर्गत कलम २१ अन्वये, वृक्ष प्राधिकरणाच्या पूर्व परवानगीशिवाय कोणतेही झाड तोडण्यास तथा तोडण्यास कारणीभूत होणे, हा अपराध आहे. अनधिकृत वृक्षतोडीच्या प्रत्येक गुन्ह्यासाठी संबंधित व्यक्तिला कमीत कमी रुपये १ हजार ते पाच हजार रुपयांपर्यंत दंड आकारण्याची तरतूद आहे. त्यासह एक आठवडा ते एक वर्षांपर्यंत कैदेची शिक्षाही होऊ शकते. (Holi)
मुंबईत चहुबाजुला हिरवळ दाटलेली असावी, यासाठी प्रत्येक मुंबईकराने प्रयत्न करायला हवेत. आपल्या अवतीभवती असलेली निसर्गसंपदा जोपासणे आणि ती वाढवणे हे सर्व नागरिकांचे कर्तव्य आहे. आपणा सर्वांना प्राणवायू देणाऱ्या झाडांचे, वृक्षांचे संरक्षण करणे आवश्यक आहे. त्यामुळे सर्व नागरिकांनी सहकार्य करावे, असे आवाहन उद्यान अधीक्षक परदेशी यांनी केले आहे. (Holi)
Join Our WhatsApp Community