Israel-Palestine Conflict : इस्रायल-हमास युद्धाच्या पार्श्वभूमीवर भारताने उचलले हे पाऊल; वाढवली सुरक्षा 

इस्रायल आणि हमास या दहशतवादी संघटना यांच्यात सुरू झालेल्या युद्धाची आग भारतात पसरू नये, हे लक्षात घेऊन दिल्लीतील इस्रायली दूतावास आणि ज्यूंच्या स्थळांची सुरक्षा वाढवण्यात आली आहे. (Israel-Palestine Conflict) इस्रायल आणि हमास यांच्यात सुरू झालेल्या युद्धानंतर दिल्ली पोलिसांनी इस्रायली दूतावास आणि दिल्लीतील चाबाद हाऊसभोवती सुरक्षा वाढवली आहे. एका सुरक्षा अधिकाऱ्याने दिलेल्या माहितीनुसार, नवी दिल्लीतील इस्रायली दूतावास आणि मध्य दिल्लीतील चांदणी चौकातील चाबड हाऊसभोवती तैनात असलेल्या स्थानिक पोलिसांना कडक नजर ठेवण्याच्या सूचना देण्यात आल्या आहेत. पॅलेस्टिनी दहशतवादी गटाने इस्रायलवर अचानक केलेल्या हल्ल्यात शेकडो लोक ठार झाले असून शेकडो जखमी झाले आहेत. त्याचबरोबर इस्रायलच्या भीषण प्रत्युत्तरादाखल गाझा पट्टी परिसरात शेकडो पॅलेस्टिनी ठार झाले असून शेकडो लोक जखमी झाले आहेत. (Israel-Palestine Conflict)

(हेही वाचा – Caste Wise Report : सेमी फायनलच्या निकालावर जातीय जनगणनेचे भविष्य)

‘हमास या दहशतवादी संघटनेने शेकडो इस्रायली नागरिकांची निर्घृण हत्या करूनही पॅलेस्टिनी सरकार हमासच्या पाठीशी उघडपणे उभे आहे. पॅलेस्टाईनचे भारतातील राजदूत अदनान अबू अल हैजा यांनी हल्ल्यातील हमासच्या भूमिकेचा निषेध करण्यास नकार दिला. जोपर्यंत पूर्व जेरुसलेमसह पॅलेस्टिनी राज्य स्थापन होत नाही, तोपर्यंत त्यांचा संघर्ष कायमच सुरू राहील’, असेही त्यांनी स्पष्ट केले. हमासच्या हल्ल्यामागे इराणचा हात असल्याच्या इस्रायली दाव्याचे अदनान अबू अल-हैजा यांनीही खंडन केले.

युरोपियन कमिशनने भूमिका बदलली 

दरम्यान, इस्रायलवरील दहशतवादी हल्ल्यामुळे पॅलेस्टाईनला सर्व आर्थिक मदत स्थगित करण्याची घोषणा करणाऱ्या युरोपियन कमिशनने (EU) आपला निर्णय फिरवला आहे. (Israel-Palestine Conflict) युरोपियन कमिशनने सोमवारी रात्री उशिरा जारी केलेल्या एका संक्षिप्त निवेदनात असे म्हटले आहे की, ‘आत्तापर्यंत देयके स्थगित केली जाणार नाहीत. हमासने इस्रायलवर केलेले हल्ले पाहता अशा मदतीचा तात्काळ आढावा घेतला जाईल. युरोपियन कमिशनचे आयुक्त ऑलिव्हर वार्हेली यांनी हमासच्या इस्रायलवरील हल्ल्याला दहशतवादी आणि क्रूरता म्हणून संबोधले आणि सोमवारी सांगितले की युरोपियन कमिशनने पॅलेस्टिनींना त्वरित प्रभावाने सर्व देयके स्थगित केली आहेत. ही घोषणा का मागे घेण्यात आली, हे अद्याप सांगण्यात आलेले नाही.

हमासच्या हल्ल्यानंतर इस्रायलच्या प्रत्युत्तर कारवाईच्या पार्श्वभूमीवर संयुक्त राष्ट्रांनी (UN) पॅलेस्टिनी भागातील नागरिक आणि मानवतावादी गरजांबद्दल चिंता व्यक्त केली आहे. संयुक्त राष्ट्राचे महासचिव अँटोनियो गुटेरेस म्हणाले, पॅलेस्टिनी लोकांच्या दुःखाची मला जाणीव आहे, मात्र हमासने इस्रायलमध्ये ज्या प्रकारे दहशतवादी हल्ले केले आणि निष्पाप लोकांची निर्घृण हत्या केली, ते अजिबात सहन करता येणार नाही. त्यांनी इस्रायल आणि गाझामधील नागरिकांच्या संरक्षणासाठी आवाहन केले आणि हमासने नागरिकांना ओलीस ठेवल्याचा निषेध केला. आणखी अनेक निष्पाप लोकांचा जीव जाण्याची भीती त्यांनी व्यक्त केली. (Israel-Palestine Conflict)

हेही पहा –