कोरोना लढाईसाठी आता सरकारने घेतला ‘हा’ महत्वाचा निर्णय!

कोरोना विषाणूला प्रतिबंध करण्यासाठी सर्व आघाड्यांवर प्रयत्न सुरू आहेत. त्यासाठी जे लागेल ते सर्व काही सरकार करत आहे. रुग्ण संख्येत होणारी वाढ लक्षात घेता, आरोग्य कर्मचा-यांना सेवा देताना प्रतिबंधात्मक साहित्यांअभावी व्यत्यय येऊ नये आणि त्यामुळे रुग्णांची हेळसांड होऊ नये, यासाठी लागणारे सर्व साहित्य तात्काळ खरेदी करण्याचे आदेश आपत्ती व्यवस्थापन, मदत व पुनर्वसन मंत्री विजय वडेट्टीवार यांनी दिले आहेत.

असे आहेत आदेश

कोरोनावर मात करण्यासाठी राज्यात युद्ध पातळीवर संघर्ष सुरू आहे. या महायुद्धात वैद्यकीय कर्मचारी दिवस-रात्र लढत आहेत. स्वतःची व कुटुंबाची पर्वा न करता सेवा देत आहेत. ही सेवा देताना त्यांच्याकडे पुरेसे प्रतिबंधात्मक साहित्य उपलब्ध असावे, यासाठी मंत्री विजय वडेट्टीवार यांनी आपत्ती व्यवस्थापन, मदत व पुनर्वसन विभागाकडून १३२ ऑक्सिजन प्लांट, ४० हजार ७०१ ऑक्सिजन सांद्रित्र (Oxygen concentrator), २७ ISO TANKS, २५ हजार मेट्रिक टन लिक्विड मेडिकल ऑक्सिजन, १० लाख रेमडेसिवीर इंजेक्शनच्या कुप्या खरेदी करण्याचे आदेश दिले आहेत.

(हेही वाचाः महापालिका खरेदी करणार २०० व्हेंटिलेटर!)

काय म्हणाले नेमकं वडेट्टीवार

कोरोना विषाणू हे जागतिक संकट आहे. आपल्या देशाला संकट नवीन नाही, या संकटातूनही आपण बाहेर पडू. या संकटाचा मुकाबला आपण सर्वांनी मिळून एकजुटीने करुया. पण या विषाणूचा प्रादुर्भाव रोखण्यासाठी नागरिकांनी गर्दी कमी करणे अत्यंत गरजेचे असून, त्यासाठी प्रत्येकाने प्रयत्न करायला हवेत. या विषाणूचा प्रादुर्भाव रोखण्यासाठी शासन व प्रशासन वेळीच पावले उचलून विविध आदेशांची अंमलबजावणी करत असल्याचे, वडेट्टीवार यांनी सांगितले. प्रशासनाच्यावतीने योग्य त्या उपाययोजना गतीने करण्यात येत आहेत. केंद्र व राज्य शासन तसेच विभागीय आयुक्त व जिल्हाधिकारी यांनी दिलेल्या सूचनांचे नागरिकांनीही काटेकोर पालन करणे आवश्यक आहे. या आजारावर वेळीच उपचार झाले आणि रुग्णांनी डॉक्टरांच्या सूचनांचे पालन केले, तर हा आजार निश्चित बरा होतो. म्हणून कोणीही या आजाराबाबत चुकीच्या अफवा पसरवू नये, असे वडेट्टीवार यांनी सांगितले आहे.