राज्यात लसीकरणाचा चौथा टप्पा! लसीकरण केंद्रातील गोंधळाचे काय? 

राज्यात गुरुवार, १ एप्रिलपासून लसीकरणाचा चौथा टप्पा सुरु झाला आहे. त्यामध्ये सरसकट ४५ वयापेक्षा अधिक वयस्क असलेल्या नागरिकांना कोरोना प्रतिबंधात्मक लस देण्यात येत आहे. त्यामुळे राज्यात आरोग्यसेवक, ज्येष्ठ नागरिक यांच्यासह आता ४५ हून अधिक वय असलेल्या सुमारे ४० लाख नागरिकांचे लसीकरण करण्याचे आव्हान सरकारपुढे आहे. याआधीच्या टप्प्यात लसीकरणासाठीच्या नोंदणी संदर्भातील सावळागोंधळ अजून थांबलेला नसताना पुन्हा मोठ्या संख्येने नागरिकांची भर पडल्यावर त्यांचे नियोजन कसे करणार, असा प्रश्न आता निर्माण झाला आहे.

मुंबईत बीकेसी जम्बो, गोरेगाव नेस्को जम्बो, केईएम, नायर आणि राजावाडी या ठिकाणी लसीकरण केंद्र सुरु असून हे केंद्र दोन शिफ्टमध्ये चालवण्यात येणार आहेत. पुढील काही दिवसांत आणखी ५ नवीन केंद्रे सकाळी ८ ते रात्री ८ या वेळेत सुरु करण्यात येणार आहेत. दरम्यान चौथ्या टप्प्यासाठी केंद्राने राज्याला २७ लाख डोस पाठवले आहेत, मात्र राज्य सरकारने हे डोस अपुरे असून आणखी देण्याची मागणी केली आहे. उपमुख्यमंत्री अजित पवार यांनीही कोरोनाच्या दुसऱ्या लाटेत महाराष्ट्रात सर्वाधिक रुग्ण संख्या आढळून येत आहेत. त्यामुळे राज्यात अधिकाधिक प्रमाणात लसीकरण सुरु केले पाहिजे, त्याकरता केंद्राने सहकार्य करावे, असे मत व्यक्त केले आहे. डोंबिवली येथे एका नागरिकाने आरोग्य सेतूवरून लसीसाठी नोंद केली असता त्यांना मोफत आणि सशुल्क लसीकेंद्रांवरही लस उपलब्ध नाही, आठवडाभर लस मिळणार नाही, असे कारण दिले.

दरम्यान असे सर्व असले तरी लस घेण्यापूर्वी संबंधितांनी कोविन ऍप अथवा आरोग्य सेतू ऍप वर नोंदणी करण्याची सक्ती करण्यात आली आहे. त्यात अजूनही जुन्याच समस्या भेडसावत आहेत. ऍप चालू नसणे, सर्वर डाउन असणे अशा समस्यांना अजूनही नागरिकांना सामोरे जावे लागत असल्याने त्यांचा वेळ वाया जात आहे. त्यातच नागरिकांना सार्वजनिक सुट्यांच्या दिवशीही लसीसाठी तारीख दिली जात आहे. प्रत्यक्षात मात्र त्या दिवशी लसीकरण केंद्र बंद असते, असेही प्रकार घडत आहेत.