- प्रतिनिधी
मुंबई महापालिकेच्या चतुर्थ श्रेणी कर्मचाऱ्यांना हक्काचे घर मिळावे यासाठी आगामी अधिवेशनात प्रश्न मांडण्याचे आश्वासन भाजपा विधानपरिषद गटनेते आमदार प्रविण दरेकर (Pravin Darekar) यांनी दिले आहे. चेंबूर येथे आयोजित ‘आपला संचालक-विष्णू घुमरे चषक २०२५’ भव्य ओव्हर आर्म क्रिकेट स्पर्धेच्या बक्षीस वितरण समारंभात ते बोलत होते.
स्पर्धेचा उद्देश आणि पारितोषिक वितरण
मुंबई महापालिकेतील विविध खात्यांतील कर्मचारी व अधिकाऱ्यांसाठी आयोजित या क्रिकेट स्पर्धेचा उद्देश महापालिका कर्मचाऱ्यांमधील क्रीडा गुणांना वाव देणे आणि त्यांना आंतरराष्ट्रीय क्रिकेटमध्ये संधी मिळवून देण्याचा होता. मोठ्या उत्साहात पार पडलेल्या या स्पर्धेत विविध संघांनी सहभाग घेतला.
आमदार प्रविण दरेकर (Pravin Darekar) यांच्या हस्ते विजेत्या संघाला ५० हजार रुपये रोख रक्कम आणि बाहुबली चषक प्रदान करण्यात आला. या स्पर्धेत एच-पश्चिम विभाग संघाला प्रथम क्रमांकाचा गौरव मिळाला. अतुल इलेव्हन, मुलुंड या संघाने द्वितीय क्रमांक पटकावला आणि २५ हजार रुपये रोख रक्कम व बाहुबली चषक प्रदान करण्यात आला.
व्यक्तिगत कामगिरीबद्दल मालिकावीराला २५०० रुपये, उत्कृष्ट क्षेत्ररक्षक, गोलंदाज, फलंदाज यांना प्रत्येकी २००० रुपये, तसेच सामनावीरांना टी-शर्ट देऊन गौरविण्यात आले.
(हेही वाचा – Manipur Violence : मणिपूर पोलिसांना मोठे यश; 2 दहशतवाद्यांना अटक)
आ. प्रविण दरेकर यांचे आश्वासन
बक्षीस वितरण समारंभात बोलताना आमदार दरेकर (Pravin Darekar) यांनी महापालिका कर्मचाऱ्यांचे कौतुक केले आणि त्यांचे कष्ट ओळखून आगामी अधिवेशनात चतुर्थ श्रेणी कर्मचाऱ्यांच्या हक्काच्या घरांचा प्रश्न मांडण्याचे ठोस आश्वासन दिले.
“महापालिकेतील कर्मचाऱ्यांनी शहराच्या उभारणीत मोलाचे योगदान दिले आहे. त्यांच्या निवासाच्या समस्या सोडवणे ही माझी प्राथमिकता आहे. अधिवेशनात हा मुद्दा मांडून ठोस पावले उचलली जातील,” असे दरेकर (Pravin Darekar) म्हणाले.
(हेही वाचा – पुण्यात Guillain Barre Syndrome चे २४ संशयित रुग्ण ; राज्य सरकार अॅक्टिव्ह मोडवर, काय आहे हा आजार ?)
उत्सवाला मान्यवरांची उपस्थिती
या स्पर्धेचे आयोजन म्युनिसिपल बँक संचालक विष्णू घुमरे, वर्षा माळी, मुकेश घुमरे यांनी केले होते. बक्षीस वितरण समारंभात माजी आमदार कांताताई नलावडे, भाजपा नेते अनिल ठाकूर, धर्मवीर पांडे, नगरसेवक सुषमा सावंत, मुंबई बँकेचे संचालक विठ्ठल भोसले यांसह अनेक मान्यवर उपस्थित होते.
महापालिकेतील कर्मचाऱ्यांनी आयोजित केलेली ही स्पर्धा आणि त्यांच्या हक्कांच्या मुद्द्यावर दिले गेलेले आश्वासन हे पुढील काळात महत्त्वपूर्ण ठरणार आहे.
हेही पहा –
Join Our WhatsApp Community