मुंबईकरांनो, पुढील १५ दिवस महत्वाचे : ऑक्सिजनचा पुरवठा कमी

मागील १५ दिवसांत मुंबईतील कोविड रुग्णांची दैनंदिन संख्या ८ ते १० हजार दरम्यान स्थिरावली असली तरी पुढील १५ दिवस आणखी महत्त्वाचे आहेत. रुग्णांची वाढलेली संख्या आणि त्यांना लागणारा ऑक्सिजन पाहता पुरवठ्याची व्यवस्था सुरळीत राखणे अत्यंत आवश्यक आहे. मुंबईतील रुग्णालयांना सध्या २३५ मेट्रिक टन इतका ऑक्सिजन पुरवठा होत असून वाढती रुग्ण संख्या पाहता अधिकची मागणी शासनाकडे केली असल्याची महापालिका आयुक्त इक्बालसिंह चहल यांनी स्पष्ट केले.

मुंबईतील कोविड रुग्णांसाठी ऑक्सिजन पुरवठा सुरळीत राखण्याबाबत राज्याचे पर्यावरण, पर्यटन व राजशिष्टाचार मंत्री तथा मुंबई उपनगर जिल्हा पालकमंत्री आदित्य ठाकरे, मुंबई महानगरपालिका आयुक्त इक्बाल सिंह चहल, अन्न व औषध प्रशासन आयुक्त अभिमन्यु काळे  यांच्या प्रमुख उपस्थितीत गुरुवारी व्हिडीओ कॉन्फरन्सीद्वारे आढावा बैठक घेतली. त्यावेळी आयुक्त चहल यांनी ही माहिती दिली.

मुंबईत येत्या आठवड्यात २२ हजार रुग्णखाटा

मुंबई महानगरपालिका क्षेत्रात महानगरपालिका, शासकीय आणि खासगी असे मिळून एकूण १५० कोविड रुग्णालय आहेत. या रुग्णालयांमध्ये आजमितीस २० हजार रुग्णशय्या असून येत्या आठवड्यात २२ हजार इतक्या होणार असल्याचे आयुक्त चहल यांनी सांगितले. अन्न व औषध प्रशासन खात्यावर असलेला अत्यंत ताण लक्षात घेता, मुंबईतील ऑक्सिजन पुरवठा संदर्भात समन्वय राखण्यासाठी महानगरपालिकेच्या वतीने ६ अधिकाऱ्यांची समन्वय अधिकारी म्हणून तातडीने नियुक्ती करण्यात येत आहे. मुंबईतील २४ प्रशासकीय विभागांसाठी प्रत्येकी ४ विभागास १ याप्रमाणे हे समन्वय अधिकारी कामकाज सांभाळतील. तसेच प्रत्येकी ४ विभागास १ याप्रमाणे एकूण ६ ऑक्सिजन पुरवठादार नेमण्यात येतील. महानगरपालिकेचे समन्वय अधिकारी हे अन्न व औषध प्रशासन, विभागांचे सहाय्यक आयुक्त आणि ऑक्सिजन पुरवठादार यांच्यात समन्वय साधून ऑक्सिजन पुरवठा योग्यरित्या व वेळीच उपलब्ध होत राहील, यासाठी दक्षता घेतील. खासकरुन ६४ नर्सिंग होममध्ये कोणतीही अडचण उद्भवणार नाही, यासाठी ते समन्वय साधतील. तसेच उपलब्ध ऑक्सिजनचा योग्यरित्या व काटकसरीने वापर करण्यासाठी केंद्र शासनाकडून निर्गमित मार्गदर्शक सुचनांचा अवलंब करण्याबाबत या ६४ नर्सिंग होमना सूचना करुन प्रशिक्षित करण्याची कार्यवाही महानगरपालिकेचे संचालक (वैद्यकीय शिक्षण व प्रमुख रुग्णालये) हे करतील, असे निर्देशही चहल यांनी यावेळी दिले.

(हेही वाचा : दिंडोशीचे मैदान लाटून शिवसेनेला कुणाचे करायचे आहे ‘समाजकल्याण’?)

ऑक्सिजन पुरवठा सुरळीत करणार!  

कोविड बाधित रुग्णांच्या उपचारासाठी मुंबई महानगरामध्ये आवश्यक त्या सर्व उपाययोजना केल्या जात असून २ लाख रेमडेसिवीर इंजेक्शनची मागणी देखील नोंदविण्यात आली आहे. रुग्णशय्यांची संख्या देखील वाढविली जात असून त्यामध्ये ऑक्सिजन पुरवठ्याची सोय अधिकाधिक केली जात आहे. त्यामुळे सध्या होत असलेला ऑक्सिजन पुरवठा सुरळीत राखण्याबाबत सर्व यंत्रणांनी आवश्यक तो समन्वय राखणे गरजेचे आहे. त्यासाठी लागणारे सहकार्य शासनाकडून करण्यात येईल, असे पालकमंत्री आदित्य ठाकरे असे आश्वासित केले.

अन्य राज्यांतून ऑक्सिजन घेणार   

मुंबई महानगर प्रदेशासह संपूर्ण महाराष्ट्रात देखील कोविड बाधितांसाठी ऑक्सिजनची मागणी प्रचंड वाढली आहे. स्वाभाविकच ऑक्सिजन पुरविणारे उत्पादक, यंत्रणा, वाहने यांच्यावर ताण येत आहे. असे असले तरी मुंबई महानगराची स्थिती लक्षात घेता महापालिकेकडून होणाऱ्या या मागणीचा सकारात्मक विचार केला जात आहे. अन्य राज्यातून ऑक्सिजन पुरवठा उपलब्ध करुन घेण्यासाठी शासनाकडून पाठपुरावा होत आहे. ऑक्सिजन साठा वाढल्यानंतर मुंबई महानगराला अधिकचा ऑक्सिजन साठा प्राधान्याने पुरविला जाईल, असे अन्न व औषध प्रशासन आयुक्त अभिमन्यू काळे यांनी स्पष्ट केले.