नेमकी घटना काय?
२५ तारखेला घरापासून काही मिनिटांच्या अंतरावर रमाकांत लोगडे यांच्या दुचाकीला दुसरी दुचाकी आदळली. या अपघातात रमाकांत लोगडे डोक्यावर आपटले. कुटुंबीयांनी तातडीने त्यांना नजीकच्या रुग्णालयात उपचारांसाठी दाखल केले. दुस-या दिवशी कुटुंबीयांनी त्यांना ठाणे येथील ज्युपिटर रुग्णालयात दाखल केले. परंतु रमाकांत लोगडे यांच्या प्रकृतीत सुधारणा झाली नाही. अखेरिस ३१ तारखेला डॉक्टरांनी रमाकांत लोगडे यांना मेंदू मृत जाहीर केले. या अवस्थेतील रुग्णाचा जीव वाचत नाही परंतु ठराविक काळच्याआत अवयवदान करता येते, अशी माहिती डॉक्टरांनी रुग्णाच्या नातेवाईकांनी दिली. रुग्णाचे नातेवाईक अनिल मोकल यांनी रुग्णाच्या कुटुंबीयांशी चर्चा केली. मोकल स्वतः अवयवदानासाठी नोंदणीकृत सदस्य आहेत. अवयवदानामुळे रुग्णाला कोणताही त्रास होत नाही, याविषयी मोकल यांनी कुटुंबीयांना माहिती दिली. अखेरिस ३१ तारखेला कुटुंबीयांनी अवयवदासाठी संमती दिली. वयाच्या मर्यादेमुळे तसेच इतर आजारांमुळे इतर अवयव दानाकरिता वापरले गेले नाही. या अवयवदानामुळे आग्री समाजात आता अवयवदानाची संकल्पना परिचित होईल, अशी आशा मोकल यांनी व्यक्त केली.