मुंबईकर नागरिकांना विविध नागरी सेवा-सुविधा देणारी आपली बृहन्मुंबई महानगरपालिका मुंबईकरांसाठी वेगवेगळ्या ठिकाणी विरंगुळ्याची ठिकाणेही उपलब्ध करून देत असते. या विरंगुळ्याच्या ठिकाणांपैकी अत्यंत महत्त्वाचे विरंगुळ्याचे ठिकाण म्हणजे भायखळा पूर्व परिसरातील वीरमाता जिजाबाई भोसले उद्यान व प्राणिसंग्रहालय म्हणजेच राणीची बाग. या उद्यान व प्राणिसंग्रहालयाची साप्ताहिक सुट्टी ही दर बुधवारी असते. मात्र, यापूर्वी महानगरपालिकेने मंजूर केलेल्या एका ठरावानुसार बुधवारी सार्वजनिक सुट्टी आल्यास त्या बुधवारी हे उद्यान व प्राणिसंग्रहालय जनतेसाठी खुले असते. त्यानुसार येत्या बुधवारी म्हणजेच २२ मार्चला गुढीपाडव्यानिमित्त सार्वजनिक सुट्टी आहे. मात्र, या सुट्टीच्या दिवशीही उद्यान व प्राणिसंग्रहालय जनतेच्या सुविधेकरिता खुले राहणार आहे. तर या आठवड्यातील साप्ताहिक सुट्टी ही येत्या गुरुवारी म्हणजेच २३ मार्चला रोजी असणार आहे. जेणेकरुन पाडव्याच्या सुट्टीच्या दिवशी लहान-थोरांना उद्यान व प्राणिसंग्रहालयातील प्राणी, वनस्पती, पक्षी यांना बघता येईल आणि एकूणच तेथील पर्यावरणाचा आनंद घेता येईल.
वरीलनुसार बुधवारी सदर उद्यान व प्राणिसंग्रहालय जनतेकरिता खुले असल्यास त्याच्या दुसऱ्या दिवशी म्हणजे गुरुवारी ते बंद ठेवण्यात येते. यानुसार सदर प्राणिसंग्रहालय गुरुवार, २३ मार्च रोजी जनतेकरिता बंद राहणार असल्याचे पालिका प्रशासनाने कळविले आहे. हे उद्यान साप्ताहिक सुट्टीचा दिवस वगळता आठवड्यातील इतर सर्व दिवशी नागरिकांसाठी खुले असते. त्या दिवशी सकाळी ९.३० ते सायंकाळी ५.०० या दरम्यान उद्यानाची तिकीट खिडकी सुरू असते. तर उद्यान सायंकाळी ६.०० वाजता बंद होते.
या उद्यानात प्रवेशासाठी प्रती व्यक्ती रुपये ५० इतके शुल्क असून वयवर्ष ३ ते १५ या वयोगटातील मुलांसाठी रुपये २५ इतके प्रवेश शुल्क आकारण्यात येते. विशेष म्हणजे आई-वडील आणि १५ वर्षे वयापर्यंतची २ मुले अशा ४ व्यक्तींच्या कुटुंबासाठी रुपये १०० इतके एकत्रित शुल्क आकारण्यात येते.
(हेही वाचा – कुलाबा-सीप्झ मेट्रो वर्षाखेरीस धावणार! ‘या’ २६ स्थानकांवर असणार थांबा)
Join Our WhatsApp Community