तामिळनाडूतील पूरस्थिती गंभीर झाली आहे. (Tamil Nadu Rains) गेल्या २४ तासांत झालेल्या मुसळधार पावसामुळे तूतुकुडी, तिरुनेलवेली, तेनकासी आणि कन्याकुमारी या दक्षिणेकडील जिल्ह्यांमध्ये जनजीवन विस्कळीत झाले आहे. लाखो लोक त्यांच्या घरात अडकले आहेत. सुरक्षा दलांच्या मदतीने मोठ्या प्रमाणात मदत आणि बचावकार्य सुरू करण्यात आले आहे. हे ४ जिल्हे तामिळनाडूच्या उर्वरित भागापासून वेगळे आहेत.
तामिळनाडूचे मुख्यमंत्री एम. के. स्टॅलिन सोमवारी रात्री पंतप्रधान नरेंद्र मोदी यांची भेट घेण्यासाठी नवी दिल्ली येथे पोहोचले. राज्यपाल आर. एन. रवी यांनी मंगळवारी राजभवन येथे संरक्षण आणि केंद्र सरकारच्या विभागांच्या अधिकाऱ्यांची आपत्कालीन बैठक बोलावली आहे. अधिकाऱ्यांनी सांगितले की, सोमवारी सकाळपर्यंत १,०३९ मुलांसह ७,४३४ लोकांना मदत छावण्यांमध्ये हलवण्यात आले आहे. अनेक ठिकाणी वीजपुरवठा खंडित झाला. काही ठिकाणी मोबाईल टॉवर्स कोसळल्याने जाळे विस्कळीत झाले. जिल्ह्यात ‘रेड अलर्ट’ जारी करण्यात आला आहे.
(हेही वाचा – Neelam Gorhe : संसदीय आयुधांचा वापर करीत विषय मांडावेत)
तामिराबरन नदीला पूर आला आहे
राज्य सरकारने सोमवारी रात्री उशिरापर्यंत मृतांची आकडेवारी जाहीर केली नाही, मात्र ४ जिल्ह्यांतील हजारो एकर पिके पाण्याखाली गेली आहेत. शेकडो वाहने वाहून गेली आहेत. तामिराबरानी नदीला पूर आला आहे. भारतीय नौदलही बचाव आणि मदत कार्यात सहभागी झाले आहे. तामिळनाडू सरकारने लष्कर आणि हवाई दलाचीही मदत मागितली आहे.
श्रीवायकुन्टम रेल्वे स्थानकात ५०० प्रवासी अडकले
मुसळधार पावसामुळे पूरसदृश परिस्थितीत दक्षिण रेल्वेच्या श्रीवायकुन्टम रेल्वे स्थानकावर ८००हून अधिक प्रवासी अडकले होते, त्यापैकी ३०० प्रवाशांना बाहेर काढण्यात आले परंतु ५०० प्रवासी अजूनही अडकले आहेत. दक्षिण रेल्वेने एका सोशल मीडिया पोस्टमध्ये म्हटले आहे की, सर्व अडकलेल्या प्रवाशांना बाहेर काढण्यासाठी रेल्वे ठोस प्रयत्न करत आहे. पावसामुळे निर्माण झालेली पूरसदृश परिस्थिती लक्षात घेता दक्षिण रेल्वेने अनेक गाड्यांचा मार्गही बदलला आहे.
हेही पहा –
Join Our WhatsApp Community