पुणेकरांच्या जाज्वल्य अभिमानाला बसणार धक्का! हे आहे कारण

पुण्यात दुचाकी चालवताना हेल्मेट वापणारी व्यक्ती ही पुणेकर समजली जात नाही, असं पुणेकर फार अभिमानाने सांगतात. पण आता त्यांच्या याच जाज्वल्य अभिमानाला धक्का लागण्याची शक्यता आहे. पुणे जिल्ह्याच्या जिल्हाधिका-यांनी पुण्यात हेल्मेट सक्ती करण्याचे आदेश जारी केले आहेत. त्यामुळे आता हेल्मेट घालणे बंधनकारक असल्यामुळे पुणेकरांना डोक्यावर हात मारुन घेण्याची वेळ आली आहे.

दुचाकीस्वारांना अपघाती मृत्यूचा अधिक धोका

हेल्मेट न घालता दुचाकी चालवणा-या दुचाकीस्वारांना मृत्यूचा धोका जास्त संभवतो. वाहन अपघातात आपले प्राण गमावणा-या व्यक्तींमध्ये सुमारे 80 टक्के व्यक्ती दुचाकी आणि सायकलस्वार आहेत. चारचाकी चालकांच्या तुलनेत दुचाकी चालकांना अपघाती मृत्यूचा धोका सातपट अधिक संभवतो. अपघातात दगावणा-या दुचाकी चालकांमध्ये तब्बल 62 टक्के व्यक्तींचा मृत्यू हा डोक्याला गंभीर इजा झाल्यामुळे होत असल्याचे समोर आले आहे.

(हेही वाचाः महाराष्ट्र झाला निर्बंधमुक्त; आता मास्क वापरणे ऐच्छिक, गुढीपाडवा शोभायात्रांना परवानगी)

जीव वाचवण्यासाठी निर्देश

उच्च आणि सर्वोच्च न्यायालयाने सातत्याने दिलेले निर्देश आणि मोटार वाहन कायद्यानुसार भारतात दुचाकीस्वार आणि त्याच्या मागे बसणा-या व्यक्तीला हेल्मेट घालणे बंधनकारक आहे. त्यामुळे दुचाकी अपघातात जीव वाचण्याची शक्यता 80 टक्क्यांनी वाढत असल्याचे सांगण्यात येत आहे. त्यामुळे पुणे जिल्ह्याचे जिल्हाधिकारी राजेश देशमुख यांनी हा आदेश काढला आहे. त्यानुसार 4 वर्षांवरील सर्वांना आता हेल्मेट घालणे सक्तीचे करण्यात आले आहे.

शासकीय कर्मचा-यांना बंधनकारक

पुणे जिल्ह्यातील सर्व शासकीय, निमशासकीय कार्यालये, महामंडळे, महापालिका, नगरपालिका, नगरपरिषद, सर्व शाळा, कॉलेज व सर्व शासकीय यंत्रणा, यांच्या कार्यालयात काम करणाऱ्या व दुचाकीचा वापर करणा-या सर्व अधिकारी, कर्मचा-यांना हेल्मेटचा वापर बंधनकारक करण्यात आला आहे. जनतेला मार्गदर्शक ठरावे आणि सहप्रवासांच्या सुरक्षित प्रवासासाठी हा निर्णय घेण्यात आल्याचे जिल्हाधिकारी कार्यालयाने म्हटले आहे.

(हेही वाचाः टोलच्या दरांत मोठी वाढ! 1 एप्रिलपासून असे असणार नवीन दर)