महिलांच्या सुरक्षिततेसाठी सरकार कुठेही कमी पडणार नाही!; CM Devendra Fadnavis यांची ग्वाही

• प्रतिनिधी

महिलांच्या सुरक्षेसाठी राज्य सरकारने कठोर कायदे करण्यासोबतच त्यांची अंमलबजावणीही प्रभावीपणे करण्यास प्राधान्य दिले आहे. मात्र, केवळ कायदे करून समस्या सुटणार नाहीत, तर समाजातील महिलांबद्दलची मानसिकताही बदलली पाहिजे. महिला अत्याचाराच्या तक्रारींचे तातडीने निरसन करण्यासाठी सरकार प्रयत्नशील आहे. समाजमाध्यमांवरील मॉर्फिंग आणि डीपफेक व्हिडिओंसारख्या गुन्ह्यांना आळा घालण्यासाठी सायबर तंत्रज्ञानाचा प्रभावी वापर करण्यात येत आहे. महिलांच्या सुरक्षिततेसाठी राज्य सरकार कुठेही कमी पडणार नाही, अशी ग्वाही मुख्यमंत्री देवेंद्र फडणवीस (CM Devendra Fadnavis) यांनी शनिवारी दिली.

महिला दिनानिमित्त मुख्यमंत्री आणि महिला पत्रकारांचा संवाद

आंतरराष्ट्रीय महिला दिनानिमित्त मुख्यमंत्री फडणवीस (CM Devendra Fadnavis) यांनी शनिवारी निवडक महिला पत्रकारांशी संवाद साधला. या संवादादरम्यान त्यांनी राज्यातील वाढत्या महिला अत्याचारांच्या घटनांच्या पार्श्वभूमीवर महिलांच्या सुरक्षेची हमी दिली तसेच महिलांच्या सशक्तीकरणासंदर्भात महत्त्वाचे मुद्दे मांडले.

त्यांनी महिलांना विविध क्षेत्रांमध्ये भेडसावणाऱ्या अडचणी, सुरक्षेचे प्रश्न आणि उद्योजकतेला चालना देण्यासाठीच्या सरकारी उपक्रमांवर भर दिला. समाजातील मानसिकता बदलण्यासाठी आणि स्त्री-पुरुष समानता प्रस्थापित करण्यासाठी सर्वांनी योगदान द्यावे, असे आवाहनही त्यांनी केले. या वेळी राज्यमंत्री पंकज भोयरही उपस्थित होते.

(हेही वाचा – Karnataka Congress Government चे ‘हलाल बजेट’; ‘निकाह’ साठी ५० हजार रुपये, मुसलमान मुलांना शैक्षणिक शुल्कात सवलत)

महिला उद्योजकतेला चालना – १०,००० महिलांना कृत्रिम बुद्धिमत्तेचे प्रशिक्षण

महिलांना अनेक जबाबदाऱ्या पार पाडत असताना मोठ्या संघर्षांना सामोरे जावे लागते. माध्यम क्षेत्रातील महिलांना २४ तास सतर्क राहावे लागते. व्यवसाय, घर आणि सामाजिक जबाबदाऱ्या सांभाळताना त्यांना अडचणी येतात. त्यामुळे महिला उद्योजकतेला चालना देण्यासाठी राज्य सरकारने विविध क्लस्टर्समध्ये महिला उद्योजकांसाठी खास संधी उपलब्ध करून दिल्या आहेत.

तसेच, मायक्रोसॉफ्टच्या सहकार्याने १०,००० महिलांना कृत्रिम बुद्धिमत्ता (AI) क्षेत्रात प्रशिक्षित करण्याचे अभियान हाती घेतले आहे. भविष्यातील नोकऱ्या आर्टिफिशियल इंटेलिजन्सशी संबंधित असतील, आणि महिलांनी त्यात आघाडीवर राहावे, यासाठी हा उपक्रम महत्त्वाचा ठरणार आहे, असे फडणवीस (CM Devendra Fadnavis) यांनी स्पष्ट केले.

मीडिया मॉनिटरिंगवर खुलासा – माध्यमांवरील अंकुश नाही!

माध्यमांवरील अंकुश नाही, मात्र मीडिया मॉनिटरिंगद्वारे योग्य माहिती समाजापर्यंत पोहोचवणे हा हेतू आहे, असे फडणवीस (CM Devendra Fadnavis) यांनी स्पष्ट केले.

“मीडिया मॉनिटरिंग म्हणजे एक अशी प्रणाली उभारली जात आहे, जिथे सर्व बातम्यांचे विभागीकरण होईल. नकारात्मक बातम्यांचा शोध घेऊन त्या संदर्भातील सत्य माहिती संबंधितांपर्यंत पोहोचवण्यासाठी हा उपक्रम राबवला जात आहे,” असे त्यांनी सांगितले.

(हेही वाचा – दारू पिऊन अश्लील चाळे करणे होणार non-bailable offence?)

महिला अधिकाऱ्यांचे कौतुक

महिला अधिकारी प्रशासनात महत्त्वाची जबाबदारी यशस्वीपणे पार पाडत आहेत. राज्याचे मुख्य सचिव आणि विविध विभागांमध्ये महिलांचा प्रभावी सहभाग आहे, असेही त्यांनी नमूद केले.

महिला सुरक्षिततेसाठी सार्वजनिक सुविधा सुधारणा

महिलांच्या सुरक्षिततेसाठी राज्यातील महामार्गांवर प्रत्येक ५० किलोमीटर अंतरावर सार्वजनिक स्वच्छतागृह उपलब्ध करून देण्याचा निर्णय सरकारने घेतला आहे. या सुविधा दीर्घकालीन पद्धतीने व्यवस्थापित आणि देखभाल करण्यासाठी ठोस योजना आखण्यात आली आहे.

“शालेय जीवनापासून मुलांमध्ये जेंडर इक्वॅलिटी रुजवली पाहिजे. स्त्रियांविषयी सन्मान आणि आदरभावना लहानपणापासून विकसित झाली पाहिजे. हे पालक, शाळा आणि समाज या तिन्ही स्तरांवरून शिकवले जाणे आवश्यक आहे,” असे फडणवीस (CM Devendra Fadnavis) म्हणाले.

(हेही वाचा – जम्मू-काश्मीरमधून ATS ने हिजबुल मुजाहिद्दीनच्या संशयित दहशतवाद्याला केली अटक)

सामाजिक माध्यमांवरील ट्रोलिंग आणि महिलांचे मतस्वातंत्र्य

“सार्वजनिक जीवनात वावरणाऱ्या महिलांना सातत्याने ट्रोलिंगचा सामना करावा लागतो, हे अत्यंत दुर्दैवी आहे. मात्र, काही महिला आपल्या मतांवर ठाम राहतात आणि त्याचा समर्थपणे सामना करतात,” असे त्यांनी सांगितले.

लव्ह जिहाद प्रकरणांवर कठोर कारवाई

लव्ह जिहाद प्रकरणांबद्दल बोलताना फडणवीस म्हणाले, “पूर्वी अशा घटना अपवाद म्हणून पाहिल्या जात होत्या. मात्र, तपासादरम्यान लक्षात आले की हा मोठ्या प्रमाणावर चाललेला प्रकार आहे. अनेक मुली फसवल्या जात आहेत. त्यामुळे आम्ही अधिकाऱ्यांची विशेष समिती तयार केली असून, त्यांनी या प्रकरणांचे सखोल विश्लेषण करावे, असे निर्देश दिले आहेत.”

(हेही वाचा – Amrit Bharat Station Scheme अंतर्गत कुर्ला स्टेशनच्या सुधारणा प्रकल्पास विलंब)

राजकीय वारसदारांवर खुलासा – ‘मी माझ्या घराण्यातला शेवटचा राजकारणी!’

“अनेकांना माझ्या राजकीय वारसदारांची चिंता असते. मात्र, मी माझ्या घराण्यातला शेवटचा राजकारणी असेन,” असे स्पष्ट करत फडणवीस (CM Devendra Fadnavis) यांनी राजकीय वारसदाराविषयीच्या चर्चांना पूर्णविराम दिला.

महिला सशक्तीकरणासाठी सरकार कटिबद्ध!

या संवादादरम्यान महिलांच्या सुरक्षिततेसाठी आणि सशक्तीकरणासाठी राज्य सरकार कटिबद्ध असल्याचा पुनरुच्चार फडणवीस (CM Devendra Fadnavis) यांनी केला.

बैठकीला महत्त्वाच्या अधिकाऱ्यांची उपस्थिती

या वेळी माहिती आणि जनसंपर्क विभागाचे प्रधान सचिव तथा महासंचालक ब्रिजेश सिंह, संचालक हेमराज बागुल, संचालक किशोर गांगुर्डे आणि संचालक दयानंद कांबळे उपस्थित होते.

महिला सुरक्षेसाठी कठोर कायदे, तंत्रज्ञानाचा वापर, सार्वजनिक सुविधा सुधारणा आणि महिला उद्योजकतेला चालना देण्यासाठी सरकार ठोस पावले उचलत आहे. महिला दिनानिमित्त घेतलेल्या या संवादात मुख्यमंत्री देवेंद्र फडणवीस (CM Devendra Fadnavis) यांनी महिलांच्या सशक्तीकरणासाठी सरकारची बांधिलकी अधोरेखित केली.

हेही पहा –