नियमबाह्य भाड्याच्या तक्रारींसाठी लवकर एकच व्हॉट्सअॅप नंबर; परिवहनमंत्री Pratap Sarnaik यांची घोषणा

• प्रतिनिधी

नियमबाह्य भाडे आकारणाऱ्या, भाडे नाकारणाऱ्या आणि गैरवर्तन करणाऱ्या रिक्षा, टॅक्सी तसेच ओला-उबर चालकांविरोधातील तक्रारींसाठी मुंबई महानगर क्षेत्र विकास प्राधिकरणाच्या (एमएमआरडीए) हद्दीत लवकरच एकच व्हॉट्सअॅप नंबर सुरू करण्यात येणार आहे. या संदर्भात परिवहनमंत्री प्रताप सरनाईक (Pratap Sarnaik) यांनी गुरुवारी (२० मार्च) महत्त्वपूर्ण घोषणा केली. ते वांद्रे पूर्व मतदारसंघातील बांद्रा, खार आणि इतर रेल्वे स्थानक परिसरातील रिक्षा-टॅक्सी चालकांच्या अरेरावीविरोधात आयोजित बैठकीत बोलत होते. या बैठकीला वांद्रे पूर्वचे आमदार वरुण सरदेसाई आणि मोटार परिवहन विभागाचे अधिकारी उपस्थित होते.

(हेही वाचा – कुष्ठपीडितांना मिळणाऱ्या अनुदानात दरमहा ४ हजार रुपयांची वाढ; Ram Naik यांनी फडणवीसांचे केले कौतुक)

प्रवाशांच्या तक्रारींकडे लक्ष

वरुण सरदेसाई यांनी बांद्रा, खार आणि अंधेरी रेल्वे स्थानक परिसरात रिक्षा-टॅक्सी चालकांकडून प्रवाशांना होणाऱ्या त्रासाकडे लक्ष वेधले. “हे चालक नियमबाह्य भाडे आकारतात, गैरवर्तन करतात आणि अनेकदा प्रवाशांना इच्छित ठिकाणी सोडण्यास नकार देतात. परिवहन विभागाने तातडीने ठोस उपाययोजना कराव्यात,” अशी मागणी त्यांनी केली. या पार्श्वभूमीवर मंत्री सरनाईक (Pratap Sarnaik) यांनी सांगितले की, “प्रवाशांनी आपल्या गैरसोयींबाबत या नव्या व्हॉट्सअॅप नंबरवर तक्रार नोंदवावी. एका आठवड्याच्या आत संपूर्ण एमएमआरडीए क्षेत्रासाठी एकच हेल्पलाइन नंबर प्रदर्शित करून त्याला व्यापक प्रसिद्धी दिली जाईल.”

(हेही वाचा – Sunil Chhetri : आंतरराष्ट्रीय पुनरागमनाच्या सामन्यात सुनील छेत्रीचा गोल, मैदानात झाला भावनाविवश)

संयुक्त पथक आणि कठोर कारवाई

मंत्री सरनाईक (Pratap Sarnaik) यांनी मोटार परिवहन विभाग आणि वाहतूक पोलिसांना संयुक्त पथक नेमण्याचे निर्देश दिले. “ज्या भागात रिक्षा-टॅक्सी चालकांकडून प्रवाशांना त्रास होतो, तिथे वारंवार तपासणी मोहिमा राबवाव्यात,” असे ते म्हणाले. सध्या अंधेरी प्रादेशिक विभागासाठी ९९२०२४०२०२ हा व्हॉट्सअॅप नंबर कार्यरत आहे. तक्रार नोंदल्यानंतर संबंधित चालकाला नोटीस पाठवणे बंधनकारक असेल आणि तक्रारीच्या गंभीरतेनुसार त्याचा परवाना रद्द करण्याची कारवाईही केली जाईल, असे निर्देश त्यांनी परिवहन विभागाला दिले.

(हेही वाचा – जामियात शिकणाऱ्या Badar Khan ला हमासशी संबंध असल्याच्या आरोपामुळे अमेरिकेत अटक; व्हिसाही केला रद्द)

चिपळूण बसस्थानकाचे काम एप्रिलपासून

दुसऱ्या एका बैठकीत परिवहनमंत्री सरनाईक (Pratap Sarnaik) यांनी चिपळूण बसस्थानकाच्या रखडलेल्या कामाबाबत मोठी घोषणा केली. “गेली अनेक वर्षे प्रलंबित असलेले चिपळूण बसस्थानकाचे काम एप्रिल २०२५ मध्ये सुरू होईल,” असे त्यांनी जाहीर केले. एसटी महामंडळाच्या विविध प्रश्नांवर चर्चेसाठी आयोजित या बैठकीत अन्न आणि औषध प्रशासनमंत्री नरहरी झिरवाळ, क्रीडा व युवक कल्याणमंत्री दत्तात्रय भरणे, आमदार शेखर निकम, सुहास बाबर, राणा जगजितसिंग पाटील, माजी आमदार चंद्रकांत रघुवंशी आणि एसटीचे वरिष्ठ अधिकारी उपस्थित होते. या बैठकीत बसस्थानकाच्या पायाभूत सुविधा सुधारण्यावरही चर्चा झाली.

या दोन्ही घोषणांमुळे प्रवाशांना मोठा दिलासा मिळण्याची शक्यता आहे. एकीकडे रिक्षा-टॅक्सी चालकांच्या मनमानीविरोधात तक्रार नोंदवण्यासाठी एकच व्हाट्सअप नंबर उपलब्ध होणार असून, दुसरीकडे चिपळूण बसस्थानकाचे काम सुरू होण्याने ग्रामीण भागातील प्रवाशांचा प्रवास सुलभ होईल. या निर्णयांची अंमलबजावणी कशी होते, याकडे सर्वांचे लक्ष लागले आहे. परिवहनमंत्री प्रताप सरनाईक (Pratap Sarnaik) यांनी रिक्षा-टॅक्सी चालकांच्या नियमबाह्य वर्तनावर अंकुश लावण्यासाठी तातडीने पावले उचलण्याचे संकेत दिले आहेत. एका आठवड्यात एकच व्हॉट्सअॅप नंबर सुरू होणे आणि चिपळूण बसस्थानकाचे काम एप्रिलपासून सुरू होणे, या दोन्ही बाबी परिवहन क्षेत्रातील सुधारणांचे संकेत देतात. आता या योजनांची प्रभावी अंमलबजावणी होणे महत्त्वाचे ठरणार आहे.

हेही पहा –