मालाड येथे अपघात, दोन मित्रांचा मृत्यू

भरधाव वेगात असलेल्या मोटारसायकलवरील नियंत्रण सुटल्याने मालाड येथे भीषण अपघात झाला आहे. नारळाच्या झाडाला धडकून झालेल्या या भीषण अपघातात दोन मित्रांचा मृत्यू झाला आहे. हा अपघात शुक्रवारी मध्यरात्री अडीच वाजण्याच्या सुमारास मालाड पश्चिम टी जंक्शन येथील सोनी पिक्चर कार्यालयाजवळ झाला आहे. अपघातात ठार झालेले दोघे मित्र मालाड मालवणी येथे राहत होते.

( हेही वाचा : संजय राऊतांची दाखल घेत नाही; नारायण राणेंचा हल्लाबोल)

सलीम शफी अहमद शेख आणि आमिर आरिफ शेख अशी अपघातात ठार झालेल्या मित्रांची नावे आहेत. हे दोघे मालाड मालवणी येथील गेट नंबर ५, ओसीसी कंपाउंड येथे राहत होते. सलीम आणि अमीर हे दोघे आपल्या इतर चार मित्रांसह शुक्रवारी मध्यरात्री १ वाजण्याच्या सुमारास मालाड लिंकिंग रोड येथे चहा पिण्यासाठी मोटार सायकलवरून गेले होते. त्यानंतर मोटारसायकल वरून सर्वजण मालवणी येथे घरी जाण्यासाठी निघाले असता सलीम हा सुसाट वेगाने मोटारसायकल चालवत होता. मालाड टी जंक्शन येथील सोनी पिक्चर कार्यालय येथे सलीमचे मोटारसायकलवरील नियंत्रण सुटले व मोटरसायकल फुटपाथवर चढून नारळाच्या झाडावर धडकली.

या अपघातात सलीम आणि अमीर दोघे गंभीर जखमी झाले असून पाठीमागून येणाऱ्या मित्रांनी त्यांना तात्काळ उपचारासाठी कांदिवली येथील शताब्दी रुग्णालयात आणले. डॉक्टरांनी सलीम आणि अमीर या दोघांना तपासून मृत घोषित केले. या प्रकरणी बांगुर नगर पोलिसांनी सलीम शेख याच्या विरोधात भरधाव वेगाने मोटारसायकल चालवून अमीर आणि स्वतःच्या मृत्यूला जबाबदार झाल्याप्रकरणी गुन्हा दाखल केला आहे.